2-M Tourist Arrivals Gitinguha

Ni Alex Mapoy

DOT Caraga Regional Director Leticia Tan. Photo by Alex Mapoy

BUTUAN CITY – Kampante ang kadumalahan sa Department of Tourism (DOT) Caraga nga malabwan ang ihap sa mga turista nga nangabot sa nakalabay’ng tuig dinhe sa rehiyon.

Nasayran nga lagpas sa isa ka milyon ka mga turista ang nangabot dinhe sa rehiyon sa nakalabay’ng tuig aron lamang sa paglulinghayaw ngadto sa dapit nga nindot suruyan.

Sumala ni DOT Caraga Regional Director Leticia Tan, positibo ang iyang kadumalahan nga mo doble ang ihap sa mga turista nga mangabot dinhe sa rehiyon karong tuiga.

Dugang ni Dir. Tan, usa sa gihimong lakang sa rehiyonal nga buhatan mao ang pakig-alyansa sa mga media entities ning rehiyon aron matabangan kini pag-promote sa mga tourist attractions sa Caraga.

Adtong Dominggo, pormal nga gilusad uban ni Dir. Tan, ang Nays Ta Dire – usa ka segment sa Nays TV Butuan diin ipakita ngadto sa mga viewers ang mga nindot nga tourist destinations ning rehiyon sa matag adlaw’ng Dominggo, alas-10:30 sa buntag.

Gawas niana, nanawagan usab ang opisyal sa tanang Caraganons nga mo tabang pag-promote sa tourist attractions ning rehiyon aron mas mo lig-on ang industriya sa turismo.

Pasabot sa opisyal, walay lain nga angayang magtinabangay kondi ang mga Caraganons ra usab sanglit sa maong paagi, ma-engganyo ang mga turista nga mo bubo ug puhonan ug daghan unyang trabaho ang masudlan sa mga walay trabaho.

Gidasig usab sa opisyal ang tanang Caraganons nga mo bisita sa mga tourist attractions ning rehiyon aron usab nga dili kini mahimo matod pang, “dayuhan sa sariling bayan.”