Interbensyon Paggiya sa Kabatan-onan Nagpadayon

Ni Alex Mapoy

PopCom Caraga Regional Director
Alexander A. Makinano. Photo File
of PopCom Caraga

BUTUAN CITY – Kampante ang Population Caraga nga matabangan ang kabatan-onan ning rehiyon pinaagi sa gihimong interbensyon sa komisyon nga gisugdan sukad pa sa nanglabay’ng katuigan hangtod sa umaabot panahon.

Usa niini ang pagbansay sa out-of-school-youth (OSY) gikan sa mga siyudad sa Butuan ug Cabadbaran kon unsaon nga mahimong sakto ug epektibo ang paggiya sa ilang barkada.

Mainiton nga nilambigit ang OSY nga mga Butuanon labi na sa pagtuki sa mga nag-unang isyu sa kabatan-onan pinaagi sa gihimong forum nga gi-uloha’g Usapang Barkadahan.

Gikalipay sa komisyon ang pag-abag sa Mindanao Health sa gipahigayong tulo ka adlaw nga Adolescent Youth Peer Facilitators’ Training.

Una nang gipahayag ni POPCOM Caraga Regional Director Alexander A. Makinano nga ang kabatan-onang Pilipino ang nag-atubang sa nagkadaiyang porma sa hulga ug mga suliran.

Kini matod pa, ang nahimong babag sa kabatan-onan sa tinuod nga lakaw sa kinabuhi  kansa maoy maghimo kanila nga responsable ug produktibong indibidwal.

Ang nahisgutang kalihokan, pamugos ni Makinano, importante ang maong kalihokan sa kabatan-onan sanglit  matabangan kini  nga mahimong lig-on sa pagpuyo sa praktikal nga kinabuhi sama sa paghimo sa epektibong desisyon, responsableng pagpili, ug pagkab-ot sa plano sa kinabuhi nga mahimong mabungahon.

Lauman nga daghan pang interbensyon ang himuon sa rehiyonal nga buhatan aron maseguro nga magiyahan ang tanang kabatan-on ning rehiyon sa pangandoy nga magtubo ang tanang batan-on nga responsable.