Zero Death Toll sa Livestock, Natala

Ni Alex Mapoy

DA Caraga Livestock Banner Program Coordinator 

Dr. Rochie Rey Barrios. Photo by Alex Mapoy

BUTUAN CITY – Gikomperma sa kadumalahan sa Department of Agriculture (DA) Caraga nga walay ni bisan isa ka binuhing mananap sa mga Caraganons ang natalang namatay bisan pa man nasinatian ang mild El Niño sa pipila ka bahin ning rehiyon.

Gikabutyag ni DA Caraga Livestock Banner Program Coordinator Dr. Rochie Rey Barrios, walay ni bisan isa ka local government unit (LGU) ning rehiyon ang nagpaabot nga namatyan kini sa binuhing hayop tungod sa nasinatiang kainit sa panahon.

Dugang ni Dr. Barrios, dili makonsidera nga alarming ang kainit sa panahon alang sa mga binuhing kahayopan sanglit kon hisgutan ang tugwayanan sa mga hayop, lunhaw o green pa ang kolor sa mga sagbot hinungdan nga duna pay makaon nga sagbot ang mga mananap.

Bisan pa man, gitambagan pa gihapon sa opisyal ang mga Caraganons nga dunay binuhing mananap nga batasanon ang pagpainom kanila sa daghang tubig aron kini makalahutay sa kainit sa panahon.

Dili usab maayo nga pasagdang mabuwad sa adlaw sa taas nga oras ang mga binuhing mananap labi na kadtong mga hiniktan sanglit malagmit dili kini makaagwanta sa kainit.

Gawas niana, gidasig usab sa opisyal ang tanang Caraganons nga hatagan sa hustong bitamina ang mga binuhing mananap aron magpabiling lig-on ang immune system niini.

Una nang nanggawas ang balita sa kasikbit nga mga rehiyon labi na kadtong na igo pag-ayo sa huwaw nga pipila sa mga binuhing kahayopan ang namatay human wala ka agwanta sa kainit sa panahon, apan ning rehiyon sa Caraga, walay ni bisan isa ka binuhing mananap ang gikatahong naugtas sa kainit resulta nga kini namatay.