NCCA Mikondina sa Lianga Massacre

Ni Alex Mapoy

BUTUAN CITY – Nanginlabot na ang National Commission for Culture and the Arts (NCCA) sa gibansagang Lianga massacre pinaagi sa pagkondina sa maong kremin.

Sumala ni NCCA Public Affairs and Information Office Head Rene S. Napeñas, bisan unsang porma sa bayolenteng hitabo diin mabiktima ang mga lumad labi na sa Mindanao, ila kining ikondina dungan sa panawagan nga dakpon ug silotan kadtong mga kriminal.

Dako ang respeto ni Napeñas sa mga lumad sanglit sila maoy buhing dugokan ug simbolo sa kulturang Pilipino.

Dugang ni Napeñas, ang mga inosenteng lumad, biktima lamang sa “development aggression.”

Pamugos sa opisyal, uhaw sa kalinaw ug haruhay nga pamuyo ang mga nahisgotan kinsang komunidad ingon man eskwelahan, gipuy-an sa armadong grupo.

Matag adlaw, halos gihulga ang mga lumad sa buka sa armas ug hag-as nga pagpamomba.

Gihiloan ang hunahuna sa ubang lumad kinsa maoy gihimong instrumento aron magsabwag og kagubot sa gipuy-ang komunidad.

Kinasingkasing usab nga nipaabot sa ilang pahasubo ang NCCA ngadto sa apektadong mga lumad dungan sa paghingusog nga ihatag ang tiunay nga hustisya ngadto sa mga biktima.

“We mourn and stand together in our demand for justice. We are calling for the appropriate government agency’s outright response and action towards the unjust killing of the IP leaders in Mindanao and in other parts of the country,” mensahe ni Napeñas.

Nimando na usab si NCCA Chairman Felipe M. De Leon Jr. ngadto sa ilang personahe aron tun-an ang kremin sa ingon makamugna og lakang legal batok sa mga responsable.

Hugot usab nga nanawagan si De Leon ngadto sa armadong grupo nga ihunong ang pagpamatay sa mga inosenteng lumad.