AFP Leadership Gimahayan

Ni Alex Mapoy

BUTUAN CITY – Dulot bukog ang gibati nga pagmahay sa mga lumad ngadto kang AFP Chief of Staff Lt. General Hernando Delfin Carmelo Arreza Iriberri human nabati nga wala sila gitalikdan.

Sa sulat pamahayag ni Josephine Pagalan, ang rehiyonal nga tigpamaba sa Kahugpongan sa Lumadnong Organisasyon (KASALO) Caraga, gihikyad ang tanan niining pagmahay ngadto kang Lt. Gen Iriberri.

Gikabutyag ni Pagalan, imbes si Iriberri matod pa ang gilauman sa mga lumad sa tibuok rehiyon sa Caraga nga maoy manalipod kanila gikan sa pagpangdaugdaug ug pagpangyatak sa tawhanong katungod kay kini usa ka Surigaonon, nahimo matod pa kining tigpanalipod sa mga abusadong yunit sa kasundalohan ug sa mga bandidong paramilitar.

Nagpakabuta-bungol, matod pa ni Pagalan si Iriberri sa mga bakho, danguyngoy sa kasakitan ug kapaitan nga gibati sa nahibiling mga minahal sa kinabuhi sa mga biktima nga brutal nga gipatay sa armadong grupo nga walay gikasukol dihang kini gipangpatay.

“Namati kami kanimo, tungod kay isig ka Surigaonon, ug naglaum kami nga mahinapit ka kanamo. Apan gitalikdan nimo kami, General. Nagpakabungol ka sa kamatuoran nga gisaysay sa hapit gatus ka mga nakakita ug gibarugan nimo ang mga abusadong yunit sa militar ug ilang mga bandidong paramilitar. Buta ka sa dagway sa gipanamastamasan nga lawas sa among mga minatay: gigitgitan ang liog sa among Sir Tatay Emerito “Emok” Samarca, gigapos siya ug naghigda sa iyang kaugalingong dugo sa dihang nakit-an namo siya; nagkanat ang utok ni Dionel “Onel” Campos sa yuta ug si Datu Juvello “Bello” Sinzo gipusil sa makadaghang beses, balibali ang iyang mga bukton, gikulata siya ug gipusil sa among atubangan, sa atubangan sa among mga anak. Apan nagpabilin kang bungol sa among pagpangayo og hustisya,” tipik sa pagmahay ni Pagalan.

Asoy pa ni Pagalan, labaw nga gikasakit sa mga lumad dihang gideklara ni Iriberri  nga ang nipatay sa mga biktima sa Lianga massacre, dili paramilitar.

Nakapangutana usab ang mga lumad kon dili matod pa paramilitar ang mga mamumuno sa Lianga massacre, nganong nagkuyog matod pa ang armadong grupo ug kasundalohan adtong higayona?

“Nag-ingon ka nga dili sila paramilitar. Nganong uban man sila sa imong mga tropa? Asa man ka sa panahong nahitabo kini kanamo nga imong “kaprobinsya?” sukmat ni Pagalan ngadto kang Iriberri.

Subay niini, sangko sa langit ang gibati nga pagmahay ni Pagalan ingon man ang mga biktimang lumad nga nagpuyo sa 22 ka mga komunidad sa mga lungsod sa Lianga, San Agustin, Marihatag, San Miguel ug Tago sakop sa probensya sa Surigao del Sur.

“Gitalikdan nimo kami, ang imong mga “ka-probinsya”, nga walay pagdungog sa among pagpangayo sa hustisya, sa walay pagtagad sa among pagbangutan. Sa walay bisan unsang pakisusi, niingon dayon ka nga walay sala ang imong mga tropa ug ginganlan kadtong mga nagbarug uban kanamo nga mga propagandista lamang, nagpahimulos sa katawhang Lumad,” dugang pagmahay ni Pagalan.

Ang deklarasyon ni Iriberri nga dili paramilitar ang Magahat/Bagani Force, hugot usab nga gisuportahan ni Col. Isidro L. Purisima, ang Commanding Officer sa 402nd Infantry Brigade, PA pinaagi sa pagtin-aw ngadto sa mga media nga dakong bakak ang pasangil sa militanteng grupo nga ang kasundalohan maoy nagmugna sa bandidong grupo sanglit ang grupo lamang sa lumad maoy nangunay pagmugna niini.