La Niña Masinatian sa Caraga

Ni Alex Mapoy

DEL CARMEN, Surigao del Norte – Dako ang posibilidad nga masinatian sa rehiyon sa Caraga ang La Niña kon itandi sa El Niño.

Una nang nanggawas sa balita nga apil ang rehiyon sa Caraga ang maapektohan sa El Niño.

Sa leaflets nga gipagawas sa Department of Agriculture (DA) Caraga labi na sa Information Section nga gi-uloha’g Climate Change, posible nga masinatian sa rehiyon ang mga pag-ulan.

Nunot sa La Niña o El Niño, apektado ang sektor sa agrikultura.

Pipila sa mga epekto sa pag-usab sa klima mao ang pagdaghan sa mga dangan ug sakit, pagkaparat sa tubig sa irigasyon, kanunay nga mga pagbaha, pagdahili sa yuta, huwaw, pagkawala sa tabunok sa yuta sa baybayon tungod sa nagkataas nga lebel sa dagat ingon man storm surge, ug dili matagna ang kondisyon sa panguma.

Subay niini, gitambag sa ahensya ang tanang mag-uuma nga aron maminusan ang epekto sa Climate Change, mas maayo nga mo gamit kini sa mga variety sa binhi nga makalahutay bisan dili maayo ang kondisyon sa panahon.

Wala matod pay laing paagi aron maminusan ang epekto sa pag-usab sa dagan sa panahon kondi ang pagsagop sa estratihiya nga gihanyag sa ahensya kansang paagi ang gitun-an pag-ayo sa mga makinaadmanon sa agrikultura.