Benepisyo Batok Bankruptcy Angay Ihatag

Ni Alex Mapoy

NLRC Caraga Administrative Officer V Robert M. Aying

BUTUAN CITY – Obligado ang employer nga mohatag og benepisyo sa tanggalon nga empleyado bisan pa og nagdeklara kini og bankruptcy o pagkalugi sa kompanya.

Sumala ni NLRC Caraga Administrative Officer V Robert M. Aying, dili himuong rason sa employer nga dili mohatag og benepisyo sama sa separation pay ug uban pang benepisyo nga angay madawat sa tanggalon nga empleyado tungod lamang sa pagka-bangkaruta o padayong pagkalugi sa negosyo.

Dugang ni Aying, kon nabangkaruta ang kompanya, angayan nga ipakita sa employer ang financial statement sa kompanya nga nagpamatuod nga bangkaruta na kini sa ingon dunay igong basehan ang kompanya nga mananggal og trabahante o kaha isirado ang kompanya.

Pamugos sa opisyal, sayop ang argumento sa management kon ipamugos nga puwede kining dili maghatag og separation pay ug uban pang benepisyo nga angay makuha sa yanong empleyado tungod lamang sa gikabalak-an nga pagkabangkuta negosyo.

Gitin-aw sa opisyal, kon nabangkaruta ang kompanya, puwede nga mananggal og trabahante o kaha manira sa pamatigayon, apan, wala kini nagtimaan nga dili na ma-obliga ang management paghatag og separation pay ug ubang benepisyo ngadto sa mga tanggalon.

Kon walay igong basehan ang management pagdeklara og bankruptcy unya mananggal kini og trabahante, mahimo kining ireklamo og illegal dismissal plus obligahon pa kini paghatag sa mga benepisyo nga wala nadawat sa hingtungdang trabahante.