NLRC Clients, Halos Lalaki

Ni Alex Mapoy

NLRC Caraga Administrative Officer V Robert M. Aying.
Photo by Alex Mapoy 

BUTUAN CITY – Sagad sa nagpaabot og reklamo sa National Labor Relations Commission (NLRC) Caraga batok sa tagsa-tagsa ka employer ang mga lalaki sa nakalabay’ng bulan sa Mayo ning kasamtangang tuig.

Kini basi sa datos nga gihikyad ni NLRC Caraga Administrative Officer V Robert M. Aying dihang kini nahinabi.

Sa datos, sa 58 ka mga reklamo nga gipaabot sa nagkalainlaing empleyado sa buhatan, 48 niini mga lalaki samtang 10 ang mga babae.

Gitin-aw ni Aying, nahitabo kini nga sagad nagreklamo mga lalaki sanglit kasagaran sa mga nanarbaho sa nagkadaiyang establisyemento – mga lalaki samtang diyutay lamang ang mga babae.

Tanang reklamo, dugang ni Aying, ang ila kining hatagan sa tino nga pagtagad – lalaki man o babae ang nireklamo.

Kutob sa mahimo sa buhatan, tanang reklamo nga isang-at sa mga reklamante ang paningkamotan nga ma-areglo sa ingon, dili na magastohan pa og dako ang nagreklamo ingon man ang gireklamo.

Dugang sa opisyal, kon makita nilang dehado ang employer sa reklamong gisang-at sa empleyado, tambagan nila kining makig-areglo na lang ug ihatag ang gipangayo sa reklamante basi sa nasabotan sa duha ka habig aron dili na mo gasto pa og dako.

Gihimo nila kini nga paagi sanglit nakita sa buhatan nga kon mo abot sa punto nga magkinasohay, mas dako pa hinuon pag-ayo ang duha habig hinungdan nga kon asa ang mas minus gasto, mao kini ilang ibida sa pag-inatubangay sa duha ka parte.

Alang sa opisyal, ang paghatag sa employer sa demand sa empleyado, wala nagtimaan nga kini pilde sa gisang-at nga reklamo kondi ang bayad magsilbi lamang konsuwelo sa employer ngadto sa empleyado.

Kon ugaling dili magkasabot ang duha ka habig, wala nay mahimo ang buhatan kondi, iduso ang reklamo ngadto sa korte aron matin-awan pag-ayo ang duha ka habig.