3 LGUs Pasidunggan sa PopCom

Ni Alex Mapoy

PopCom Caraga Regional Director Alexander Makinano. PopCom Caraga Photo File

BUTUAN CITY – Tulo ka mga local government units (LGUs) ang gitakda nga hatagan og pasidungog sa rehiyonal nga buhatan sa Population Commission (PopCom) Caraga sa umaabot Agosto ning kasamtangang tuig.

Kadtong mapili nga LGUs maoy makonsidera nga top 3 ranking sa regional level ug magsilbi usab kining pambato sa rehiyon alang sa national level nga Rafael M. Salas Population and Development Award (RMSPDA).

Ang madeklara nga top 3 LGU awardees sa regional level mapili tungod sa “outstanding accomplishment” nga tract record sa pagpatuman sa natad sa “health and population.”

Sumala ni POPCOM Caraga Regional Director Alexander A. Makinano, ihatag sa komisyon ang Award ngadto sa City LGU ug Municipal LGU kansang liderato hugot nga nisuporta sa “population and development” nga adbokasiya.

Dugang ni Makinano, dunay basehan nga criteria ang komisyon sa paghatag pasidungog sa hingtungdang LGU nga naglangkob sa Governance on Health and Health Financing; Access to Programs, Services and Facilities; Performance Monitoring; ug Population and Development Elements.

Subay niini, nagtinabangay ang PopCom, Department of Interior and Local Government (DILG), Department of Education (DepEd), Department of Trade and Industry (DTI), ug PhilHealth pag-validate sa LGUs’ scorecards.

Kahibaluan, gilusad sa komisyon ang RMSPDA) adtong Pebrero 18 ning kasamtangang tuig isip pagsuporta sa Philippine Population Management Program.

Gidisenyo ang RMSPDA aron ipadayon ang legasiya ni Rafael M. Salas, ang pinakaunang Filipino Executive Director nga naghatag pasidungog sa LGUs, Local Chief Executives, nagkadaiyang institusyon ug indibidwal nga naghatag sa talagsaong kontribusyon lambigit sa pag-asdang sa health and population.

Katuyuan niini nga mahatagan og pasidungog kadtong mga siyudad o lungsod nga hugot-bakos nga nisuporta sa adbokasiya sa komisyon.

Sumala ni PopCom Caraga Information Officer II Angelita Antonio, dagkong premyo ang laumang madawat sa LGU awardee kansang ganti ang pabilin pang gipugngan sa opisyal kon pila ang kantidad sanglit padayon pa kining giplantsa.