Kalidad nga Manpower, Giseguro

Ni Alex Mapoy

Mr. Hiroyuki Shiomi (center, sitting), SMCC Project Manager signed the MOA with Ma. Hydee E. Relliquete (left, sitting), Officer-in-charge of the Surigao del Norte College of Agriculture and Technology (SNCAT). Also in photo are personnel of TESDA-Surigao del Norte and SNCAT witnessing the MOA-signing. Courtesy of TESDA Surigao del Norte.

CLAVER, Surigao del Norte – Giseguro sa Technical Education and Skills Development Authority (TESDA) – Surigao del Norte nga makab-ot ang de kalidad nga middle-level manpower sa probensya.

Subay niini, gisudlan sa probensyal nga buhatan ang kasabotan tali sa Sumitomo Mitsui Construction Corporation (SMCC) Philippines sa hinapos nga bahin sa bulan sa Mayo ning kasamtangang tuig.

Gipahigayon ang pinirmahay sa Brgy. Taganito, Claver, Surigao del Norte tali nila SMCC Project Manager Hiroyuki Shiomi ug Surigao del Norte College of Agriculture and Technology (SNCAT) Officer-In-Charge (OIC) Ma. Hydee E. Relliquete.

Nakalatid sa kasabotan, tahas sa SNCAT kansang tunghaan gidumala sa TESDA, ang pagpahigayon og training, assessment ug mo hatag  sertipikasyon isip kabahin sa programa.

Tahas usab sa SMCC Philippines, Inc. mao ang paglambigit sa pagpalambo sa skills sa matag indibidwal labi na sa pagahimuong assessment ug paghatag sertipikasyon sa Heavy Equipment Operation (Wheel Loader) NC II, Heavy Equipment Operation (Backhoe Loader) NC II, Heavy Equipment Operation (Bulldozer) NC II, Heavy Equipment Operation (Rigid On-highway Dump Truck) NC II, Heavy Equipment Operation (Rigid Off-highway Dump Truck) NC II, Heavy Equipment Operation (Motor Grader) NC II, Heavy Equipment Operation (Road Roller) NC II, Heavy Equipment Operation (Hydraulic Excavator) NC II, Heavy Equipment Operation (Forklift) NC II, ug Driving NC II (Light Vehicle).

Sumala ni TESDA Caraga Specialist 1 Robert E. Roperos, nisanong ang SMCC nga gamiton ang ilang pasilidad ug makinaryas alang sa ipahigayong “training and competency assessment” samtang magsuhol usab ang naasoy’ng kompanya og heavy equipment operators ug drivers isip kabahin sa Competency Assessment Tools.

Mohatag usab ang kompanya og igong dapit dis-a himuon ang competency assessment sa Heavy Equipment Operation NC II ug Driving NC II sa SMCC Operators ug Drivers.

Gawas niana, i-hire usab sa kompanya kadtong mahimong sertipikadong driver sa Heavy Equipment Operation NC II ug Driving NC II.

Samtang, iseguro usab sa SNCAT ang hapsay nga pagpahigayon og assessment pinasubay sa lagda ug regulasyon sa Philippine TVET Qualification and Certification System (PTQCS) Guidelines ug sa nakalatid sa Procedures Manual sa Conduct of Competency Assessment.

Kargo usab sa SNCAT ang paghatag og National Certificate (NC) o Certificate of Competency (COC) ngadto sa angayang hatagan sulod sa lima hangtod napulo ka adlaw paghuman pagpahigayon sa national assessment.

Obligado usab ang tunghaan paghatag sa libre nga on-site training ngadto sa SMCC Philippines, Inc. sama sa Driving NC II qualification sibo sa gikinahanglang gidugayon sa pagbansay nga 118 ka oras katumbas sa 15 hangtod 20 ka adlaw lakip na niini ang assessment schedule.

Gihimo kini isip kabahin sa gipakusgan nga Public-Private Partnership (PPP) sa gobernong Aquino ug pagsuporta sa Human Development Cluster sa Philippine Development Plan.