Virus Nangamatay sa El Niño

Ni Alex Mapoy

DA Caraga Livestock Banner Program Coordinator Dr. Rochie
Rey Barrios. Photo by Alex Mapoy

BUTUAN CITY – Nangamatay ang virus sa kainit sa panahon bunga sa mild El Niño hinungdan nga walay binuhing mananap ang nataptan og sakit ning rehiyon sa Caraga.

Pagtin-aw kini ni Department of Agriculture (DA) Caraga Livestock Banner Program Coordinator Dr. Rochie Rey Barrios dihang kini nahinabi.

Sumala ni Dr. Barrios, walay virus ang makaagwanta sa kainit sa panahon hinungdan nga luwas ang kahayopan kon hisgutan ang sakit.

Dugang ni Dr. Barrios, bisan luwas ang kahayopan gikan sa mga sakit, apan, seguradohon lamang nga isilong ang mga hiniktang mananap aron dili kini mamatay sa kainit sa adlaw.

Mas maayo usab nga hatagan og bitamina ang mga binuhing kahayopan ug pa imnon og daghang tubig aron makasugakod kini sa kainit sa palibot.

Hinuon, gi-angkon sa opisyal nga ang sakit, anaa lamang sa palibot ug andam kining motakboy sa kahayopan, apan bunga sa kainit sa panahon, nangamatay ra usab kini.

“Mamatay ang virus sa init sa panahon. Dili sila makaagwanta mao mamatay,” pagklaro ni Dr. Barrios.

Sa pagsulat ning balita, wala nakadawat ang ahensya og report gikan sa lokal nga kagamhanan nga dunay kahayopan ang nataptan og sakit.

Una nang nagping-it ang pipila ka mga mag-uuma sa labihan ka init sa panahon sanglit nangliki ang gitikad niining basakan, apan luyo nianang tanan, nakatabang pa gihapon ang kainit sa adlaw nga mapatay ang mga virus nga anaa sa palibot nga maoy maghatag sakit sa binuhing kahayopan.