Daily Savings, Kaya sa Piniriso – Baltar

Ni Alex Mapoy

Mga piniriso sa Butuan City Jail namati sa pagpasabot bahin sa AlkanSSSya Program. Photo by Alex Mapoy

BUTUAN CITY– Kampante ang kadumalahan sa Butuan City Jail nga makatigom ang gibantayang mga piniriso human gihangop sa mga nahisgutan ang AlkanSSSya Program sa Social Security System (SSS).

Sumala ni J/SInsp. Jonathan Baltar dihang nahinabi sa mga tigbalita, bisan piniriso ang mga nahisgutan, apan duna gihapon kini makonsiderang panginabuhian sulod sa selda.

Kada adlaw, duna kini kita tungod sa nagkadaiyang livelihood programs nga gihangop sa Butuan City Jail ug gipatuman sulod sa maong pasilidad.

Dugang ni Baltar, segurado nga makatigom ang mga piniriso sanglit kon hisgutan ang pagkaon, libre kini sa goberno ug libre usab kini sa pasilidad nga gikatulgan hinungdan nga walay igong rason nga dili makatigom ang mga nahisgutan.

Ang bag-ohay nga gilusad nga programa sa SSS nga AlkanSSSya ngadto sa mga piniriso makonsiderang pabor matod pa sa kabahinan sa mga piniriso.

Gitin-aw ni Baltar, dakong tabang sa mga piniriso ang matigom nga kwarta sanglit panahon sa emerhensiya, duna kini magamit labi na kon kini mahimong gawasnon ug ang tinigom nga salapi mahimo unyang ikasugod pagpabarug sa laing anib sa kinabuhi sa komunidad nga pagapuy-an.

Una nang gipaneguro ni SSS AVP Northern Mindanao Division Atty. Edwin Alo ngadto sa mga piniriso nga ang pagka-membro niini sa SSS maoy maghatag igong seguridad pag-abot dungan sa pagdasig nga kanunayon ang paghatag sa binulan niining kontribusyon gamit ang “micro-savings scheme” sa ingon mapahimuslan ang benepisyo nga angay matagamtaman sa matag membro.

Ang AlkanSSSya Program usa ka micro-savings scheme nga gituyo pag-disenyo aron matabangan ang mga informal sector workers nga makatigom kada adlaw.

Sa maong paagi, matabangan ang hingtungdang membro nga makabayad sa binulan nga kontribusyon sa ingon makapahimulos kini sa benepisyo nga gihanyag sa ahensya.