Bukton Nabali, Mediaman Operahan

Ni Alex Mapoy

Nag-antos si Jason Lira sa bali sa walang bukton human nadisgrasya sa gimanehong motor. Photo by Alex Mapoy

BAYUGAN CITY – Gitakdang ipailawom sa operasyon ang walang bukton sa usa ka mediaman human nabali dihang aksidenteng nisimplang ang gimanehuan niining motor sa Purok 1, Brgy. Cagbas, siyudad sa Bayugan adtong Domingo, alas-6:00 ang takna sa gabii.

Naila ang biktima nga usa ka Jason Lira, provincial reporter sa Mindanao Centro Daily - Bayugan Base, hingkod ang edad, residente sa maong siyudad.

Sumala ni Lira dihang nahinabi ning mantalaan, wala niya namatikdan ang warning device nga gibutang sa kontraktor duol sa Bayugan Bridge nga kasamtangang gipailawom sa retrofitting ug strengthening.

Dugang ni Lira, ngitngit ang dapit adtong tungora hinungdan nga dihang patabok na unta kini sa Bayugan Bridge, diha pa niya namatikdan nga dunay gibutang nga warning device duol lamang sa maong tulay hinungdan nga siya na alanganin.

Warning device gibutang dul-it sa taytayan nga gipailawom sa retrofiting ug strengthening. Photo by Alvin Añonuevo.

Plano unta sa biktima nga mo minor pagpadagan, apan kon iya matod pa kadtong buhaton, seguradong mabanggaan siya sa sakyanan nga nagsunod kaniya nga kusog ang dagan.

Lantaw usab niya, kon ibangga ang gimaneho niining motor sa barandilya sa maong tulay, segurado nga dili lang bali ang iyang ma-angkon hinungdan nga nikursonada na lamang kini paglusot aron walay laing madamay resulta sa iyang pagkasangit ug pagkasimplang.

Sa hitabo, bali ang walang bukton hinungdan nga dali kining gidala sa pinakaduol nga tambalanan aron kadapatan sa tukmang medikasyon.

Tungod sa kahimtang sa biktima kinsa kinahanglan nga mapailawom sa operasyon aron subleng masumpay ang nabali niining bukog sa bukton, gibalhin kini sa Butuan City Medical Center.

Sa pagkutlo ning balita, gipanubayan pa ning mantalaan kinsa ang kontraktor sa maong proyekto.