2500 Benepisyaryo sa Serbisyo Caravan

Ni Alex Mapoy

CEREMONIAL TURNOVER. Regional Director Edna M. Mabeza hands-over a rubber planting material to the Brgy. Captains of Loreto, Agusan del Sur. Assisted by Municipal Mayor Dario Otaza and Municipal Agriculturist Alexander Bugaoan. Courtesy of Rhea C. Abao of DA Caraga.

LORETO, Agusan del Sur – Dos mil kinyentos (2,500) ka mga mag-uuma ang nakabenepisyo sa duha ka adlaw nga Serbisyo Caravan nga gipasiugdahan sa Office of the Presidential Adviser on Peace Process (OPAPP) ug Department of Agriculture (DA) Caraga.

Gipahigayon ang maong kalihokan sa Brgy. Kauswagan ug Brgy. Manawe lungsod sa Loreto sakop sa maong probensya.

Ang nahisgutang mga benepisyaryo na gikan sa siyam ka mga barangay nga naglangkob sa Bugdangan, Sabud, Kauswagan, Mabuhay, Ferdinand, Kasapa, San Mariano, Johnson, ug Sta. Teresa.

Sa maong kalihokan, nitunol si DA Caraga Regional Director Edna M. Mabeza og 10 ka sakong binhi sa mais, 50 ka sakong binhi sa certified rice seeds, 100 ka sakong upland rice seeds, 5 ka kilong binhi sa nagkadaiyang klase sa gulay, 600 ka buok rubber planting materials, ug 600 usab ka buok nga banana planting materials.

Basi sa impormasyon ni Rhea C. Abao sa DA Caraga, gipahayag matod pa ni RD Mabeza nga ang pagtunol sa nahisgutang mga binhi ug planting materials nagpadayag lamang nga andam ang goberno mo tabang sa mga residente nga nanimuyo sa mga lugar nga nanginahanglan og tabang partikular na sa mga hilit nga lugar.

Sa maong paagi matod pa, mapadayag usab ang mainitong suporta sa ahensya sa hugot nga kampanya sa goberno pagbatok sa insurhensiya.

Gawas niana, natunol usab sa rehiyonal nga buhatan ang mga gamit pang-uma ilawom sa farm mechanization program isip tabang nga mapalambo ang lebel sa panginabuhi sa mga mag-uuma.

Nasuta nga ang DA nahimong partner sa OPAPP isip pagpatuman sa mga programa sa goberno ingon man serbisyo pinaagi sa Payapa at Masaganang Pamayanan (PAMANA).

Programa kini sa goberno nga nagtumong paghatag proyekto nga ikalambo sa komunidad nga naulahi sa kalamboan.