10 Patrol Jeeps Gitunol

Ni Alex Mapoy

DILG Secretary Mar Roxas personal nitunol sa brand-new Multi-Purpose Patrol Police Jeep kang Buenavista Mayor Norbert Pagaspas. Photo by Alex Mapoy

AGUSAN DEL NORTE – Patas nga gihatagan ni Department of Interior and Local Government (DILG) Secretary Mar Roxas og tag-isa ka brand-new Multi-Purpose Patrol Police Jeep ang napulo ka mga munisipyo nga sakop ning probensya diha sa Capitol Covered Court, sakop ning siyudad, kagahapong adlawa.

Gilangkoban kini sa mga lungsod sa Buenavista, Carmen, Jabonga, Kitcharao, Las Nieves, Magallanes, Nasipit, RTR, Santiago, ug Tubay.

Tuyo niini nga mapakusog sa kapulisan sa matag munisipyo ang paghatag serbisyo ngadto sa mga Agusanon labi na sa pagsumpo sa nagkadaiyang porma sa kriminalidad ug usab isip pangandam sa posibleng paghapak sa katalagman.

Ang maong pagpang-apod-apod og sakyanan kabahin kini sa kinatibuk-ang estratihiya aron makibhangan ang kremin nga nahitabo sa matag lungsod o sa tibuok nasod.

Sumala ni Sec. Roxas, dili lang magamit ang patrol jeep sa pagresponde sa bisan unsang porma sa kriminalidad kondi magamit usab kini sa emerhensiya sama sa paghakot sa mga tawo nga mamakwit padulong sa mas luwas nga lugar ug paghakot sa mga hinabang ngadto sa mga apektadong residente.

Dugang ni Sec. Roxas, ang paghatag usab sa sakyanan nagtimaan nga ang kagamhanang Aquino nagsalig sa mga piniling opisyal nga nagdumala sa matag lungsod sama sa pagsalig sa katawhan.

Awhag sa kalihim, dili unta angayang sayangan ang maong pagsalig sa katawhan o sa goberno hinungdan angayan usab nga ampingan ang maong mga sakyanan.

Gitin-aw sa kalihim, kon unsa ang nahatag karong adlawa, wala lamang nagtimaan nga sakyanan lamang ang gihatag alang sa transportasyon kondi nagsimbolo usab kini nga ang matag usa dunay pagsalig.

Ang nahisgutang mga sakyanan gihatag sanglit “deserving” ang mga lungsod nga mo dawat niini ug isip pagpadayag sa sento porsyento niining suporta alang sa tiunay nga pagpanirbisyo.

Subay niini, kinasingkasing nga nagpaabot og pagpasalamat ang inahan sa probensya nga si Gov. Ma. Angelica Rosedell Amante – Matba ngadto kang Sec. Roxas tungod sa mainiton niining pagsuporta sa paningkamot sa probensya labi na sa paghatag seguridad sa mga Agusanon.

Dungan sa pagpasalamat, nanghinaut usab ang gobernadora nga daghan pang grasya ang madawat sa probensya gikan sa buhatan sa kalihim.

Nanawagan usab ang opisyal sa tanang Agusanon nga suportahan si Roxas sa mga plano niini labi na sa ikalambo sa probensya ug ikaayo sa kinabag-an.

Hisayran, dili lamang ang kalungsoran sa Agusan del Norte ang gihatagan og patrol jeeps kondi una na kining nanghatag ngadto sa mga lungsod nga sakop sa probensya sa Albay, Sorsogon, Zambales, Bataan, Pampanga, Western Samar, Sarangani, ug South Cotabato.