75 Kaso Nasulbad sa NLRC

Ni Alex Mapoy

NLRC Caraga Administrative Officer V Robert M. Aying.
Photo by Alex Mapoy

BUTUAN CITY – Setentay singko (75) ka mga kaso ang malamposon nga nahatagan og kasulbaran sa National Labor Relations Commission (NLRC) Caraga sa nakalabay’ng bulan sa Mayo ning tuiga.

Sa datos, mokabat sa 195 ang kinatibuk-ang kaso ang gihatagan pagtagad sa buhatan sa nasangpit nga bulan diin sa maong ihap, 50 niini ka mga kaso ang nadawat sa maong bulan lamang samtang ang nahibiling 145 ka mga kaso maoy nahibiling kaso nga wala pa nahatagan og sulbad sa buhatan sa nakalabay’ng Abril sa samang tuig.

Makita sa maong datos, sa 75 ka mga kaso nga na dispose, 29 niini ang amicably settled, 11 ang decided on merits, ug 43 ang na dismissed/withdrawn.

Sumala ni NLRC Caraga Administrative Officer V Robert M. Aying, dako ang tinguha sa buhatan nga tanang kaso nga giduso sa mga reklamante sa buhatan ang mahatagan sa hinanaling kasulbaran.

Dugang ni Aying, tanang reklamo nga giduso ang paningkamotan nila nga ma-areglo aron dili na mo dako pa ang kaso ug usab dili na mahasol pa pag-ayo ang duha ka habig.

Areglo ang pinakamaayong solusyon nga ilang idiga sa matag higayon nga duna silay husayon sanglit nakita sa buhatan nga kon isang-at sa korte ang kaso, magastohan na ang duha ka habig ug ang mahimong makaluluoy mao kadtong reklamante nga naglisod ang panginabuhi.

Alang sa opisyal, kon maminaw lamang ang reklamante ug ang gireklamo sa sentiment sa matag usa, dali lamang kining husayon, apan kon magmagahi ang mga nahisgutan, walay mahimo ang rehiyonal nga buhatan kondi ang pagsunod sa kagustohan sa duha nga ipaabot ngadto sa korte ang kaso.

Gitin-aw sa opisyal, ang reklamo batok employer magpadayon kon dunay empleyado ang mapihig sa tawhanon niining katungod isip trabahante.

Mawagtang lamang ang reklamo kon ang tanang employer makaantigo nga molantaw sa interes sa mga empleyado pinaagi sa paghatag sa hustong suholan, hustong benepisyo, ug mapalig-on ang relasyon sa duha ka habig.