Alternative Source sa Tubig Gitun-an

Ni Alex Mapoy

BCWD Senior Public Relations Officer Ramil S. Barquin. 

Photo by Alex Mapoy

BUTUAN CITY – Gitun-an karon sa Butuan City Water District (BCWD) ang Brgy. Bit-os sakop ning siyudad nga mahimong “alternative source” sa tubig sa water district.

Sumala ni BCWD Senior Public Relations Officer Ramil S. Barquin, lauman nga adiser mahuman ang kasamtangang tuig, mahuman ang gihimong pagtuon sa ilang mga inhenyero. sa water district

Dugang ni Barquin, gihimo kini nga lakang bisan pa man og gipaspasan ang konstraksyon sa Butuan City Bulk Water Supply Project sa Sitio Iyao Brgy. Anticala ning siyudad. 

Inisyatiba kini sa water district isip pagpaneguro nga maserbisyohan ang katawhang konsumidor sa dakbayan.

Gitin-aw sa opisyal, kon makita sa working team nga kayang mo prodyus og 1,000 cubic meters nga tubig ang Brgy. Bit-os, muntaran gilayon nila kini og Water Reservoir.

Ang mapundo unyang tubig maoy i-suplay sa duha ka barangay – ang Bit-os ug San Vicente sa higayon mo hinay ang pressure sa tubig gikan sa watershed.

Pasabot sa opisyal, ang tubig unya nga gikan sa watershed nga i-suplay alang unta sa Brgy. San Vicente sa higayon nga mo hinay ang pressure, ang i-divert kini pagsuplay sa ubang bahin ning siyudad sanglit ang tubig gikan sa Brgy. Bit-os maoy buhian aron pabiling makatubig ang nasangpit nga duha ka barangay.

Ang nahisgutang senaryo ang pabilin pang damgo sanglit wala pa nahuman ang gihimong pagtuon sa mga inhenyero.

Kahinumdoman nga nihanyag si RTR Mayor Ernie Ceniza sa kagamhanang lokal ning siyudad nga mahimo nga sa ilang lungsod kuhaon ang tubig nga isuplay sa dakbayan sa Butuan sanglit nanubra ang ilang tubig.

Sa bahin usab ni Barquin, nindot ang maong hanyag, apan ang problema, layo ang maong lungsod ug dako usab ang gasto kon sa maong lungsod kuhaon ang dugang tubig nga i-suplay ning siyudad.

Subay niini, dinhe na lamang sa siyudad mangita ang water district og laing tinubdan sa tubig sanglit anaa lamang kini sa duol.