Contractor sa DPWH Silotan

Ni Alex Mapoy

Gamay nga warning device mahimong makapatay sa motorista. Courtesy of Alvin Añonuevo

BUTUAN CITY – Pahamtangan og sanction kadtong contractor sa nagkadaiyang imprastraktura sa goberno kon ugaling sa gipatumang proyekto dunay nadisgrasya tungod sa wala pagsunod sa gipermahang Traffic Management Plan.

Pagklaro kini ni Department of Public Works and Highways (DPWH) Caraga Spokesperson Connie Calo dihang nahinabi.

Sumala ni Calo, ang contractor sa usa ka proyekto sa goberno dunay permahan nga Traffic Management Plan (TMP) adiser sugdan ang proyekto.

DPWH Caraga Spokesperson Connie Calo. Photo by Alex Mapoy

Ang TMP magsilbing tamdanan sa contractor nga magbutang og mga saktong signage sa ingon nga sa layo pa lang, makabantay nang daan ang mga nagmaneho sa nagkadaiyang sakyanan nga dunay gi-construct sa nahisgutang dapit ug niana, makalikay na kining daan.

Dugang ni Calo, kon  dunay madisgrasya tungod sa kapalpakan sa contractor pagbutang og signage sa gitrabahong proyekto, mahimo kining pahamtangan og sanction sa buhatan pinasubay sa nakalatid sa Department Order No. 13 series of 2008 nga gi-ulohan og Guidelines in the Procurement and Installation of Road Safety Devices and Facilities.

Gitin-aw usab sa opisyal, adiser ipahamtang ang sanction, imbestigahan una kon unsay hinungdan sa pagka-disgrasya aron masayran kon kinsa ang sad-an o angayang manubag.

Himuon kini sanglit dili matod pa, tanang contractor ang makonsiderang sad-an sanglit bisan dunay gimuntar nga signage sa gipatumang proyekto, apan ang sakyanan nadisgrasya gihapon sanglit ang driver impluwensiyado kini sa ilimnong makahubog.

Apan pasabot sa opisyal, kon nadisgrasya ang sakyanan tungod sa kapalpakan pagbutang og saktong signage, angayan lamang manubag ang hingtungdang contractor.

“Dunay permahan ang contractor nga Traffic Management Plan. Kon wala natuman ang ilang plano, ma-sanction sila sa opisina basi sa Department Order No. 13. Kon nagkulang sila unya dunay nadisgrasya, ma-sanction gyud sila. But, dili man pud tanan nuh? Dunay i-conduct nga investigation aron mahibaw-an kon kinsay dunay sala. Kon unya, ignon ta duna silay liability, silay mo tubag,” pahayag ni Calo.