Mangrove Project Gihangop

Ni Alex Mapoy

A senior staff of CENRO Lianga gives instruction to the participants on how to plant the propagules. Courtesy of DENR Caraga Spokesperson Eric Gallego

BAROBO, Surigao del Sur – Usa sa mga kompanya sa minahan ning rehiyon sa Caraga ang nihangop sa Adopt a Mangrove Project sa Department of Environment and Natural Resources (DENR) Caraga.

Ang naasoy’ng proyekto kabahin kini sa gipakusgan nga kampanya ni Pangulong Noynoy Aquino ang National Greening Program (NGP).

Sumala ni DENR Caraga Spokesperson Eric Gallego, gikalipay sa rehiyonal nga buhatan ang paghangop sa Philsaga Mining Company (PMC) sa nahisgutang proyekto pinaagi sa pagtisok sa mga semilya sa mangrove o bakhaw sa Wakat, Barobo, Surigao del Sur.

Dugang ni Gallego, gisaludohan matod pa ni DENR Caraga Regional Director Nonito M. Tamayo ang Philsaga sa gihimo niining inisyatiba.

Gitin-aw sa opisyal, ang gihimo sa nahisgutang kompanya sa mina ang insakto usab nga ang buhatan nangita og igong dapit aron katamnan sa mga semilya sa bakhaw.

Hisayran nga mokabat sa P400 milyones ang inisyal nga pundong gipagawas sa Department of Budget and Management (DBM) alang sa katumanan sa Mangrove ug Beach Forest Plantations labi na sa upat ka mga probensya nga na apektohan pag-ayo sa bangis nga bagyong Yolanda nga nahimutang sa amihanang sidlakan ning rehiyon.

Students joined mangrove propagules planting in Wakat, Barobo, Surigao del Sur. Courtesy of DENR Caraga Spokesperson Eric Gallego

Gikomperma matod pa ni Tamayo, ang PENRO Dinagat province maoy unang nakadawat og pundo balor P3.6 milyones alang sa pagahimuong rehabilitasyon sa baybayon human kini na apektohan sa nasangpit nga bagyo sa tuig 2013.

Atol sa gihimong pagpananom, kapin matod pa sa 500 ka mga indibidwal ang nagtinabangay pagtanom aron mahatagan og katumanan ang maong kalihokan.

Nanghinaut na lamang ang opisyal nga dili lang ang maong kompanya sa mina ang mo hangop sa nahisgutang proyekto kondi daghan pang mga civic groups ang mo suporta ug magpahigayon sa pagpananom alang niining katuyoan.

Sa pagkutlo ning balita, ang rehiyonal nga buhatan sa DENR padayon nga nagsusi sa pipila ka mga baybayon ning rehiyon labi na sa probensya sa Surigao del Norte, Surigao del Sur, ug Agusan del Norte.