3 Checkpoints Gimuntar

Ni Alex Mapoy

L-R: DENR Regional Directors Joselin Marcus Fragada and Nonito M. Tamayo of Region 11 and Region 13 respectively congratulate each other during the inauguration of the Joint Forest Monitoring Center at Barangay Rizal, Monkayo, Compostela Valley. Courtesy of DENR Caraga Spokesperson Eric Gallego. 

BUNAWAN, Agusan del Sur – Tulo ka mga checkpoints ang gimuntar sa liderato sa Department of Environment and Natural Resources (DENR) Caraga ug DENR Region XI.

Nahimutang ang tulo ka mga checkpoints sa utlanang bahin sa Agusan del Sur ug Monkayo, Compostela Valley Province; utlanang bahin sa Laac, Compostela Valley ug Loreto, Agusan del Sur; ug utlanang bahin sa Lingig, Surigao del Sur ug lungsod sa Boston, Davao Oriental.

Gihimo kini subay sa kampanya sa duha ka rehiyon nga pag-abot sa Hunyo 30 ning tuiga, mawagtang na sa hingpit ang illegal logging activities sa duha ka rehiyon.

Nanguna sa pagmuntar sila DENR Caraga Regional Director Nonito Tamayo ug DENR XI Regional Director Joselin Marcus Fragada.

Basi sa impormasyon ni DENR Caraga Spokesperson Eric Gallego, nanghinaut matod pa si RED Fragada nga subay sa pagmuntar sa mga checkpoints sa estratihikong lugar, madiskurahe ang mga illegal loggers pagpadayon sa kalihokang iligal sa duha ka rehiyon.

Malaumon matod pa si Dir. Fragada nga suportahan sa katawhan ang kampanya sa ahensya aron maundang na sa hingpit ang maong matang sa kalihokan.

Sa bahin usab ni Dir. Tamayo, gipahayag matod pa sa opisyal nga mahunong na ang iligal nga kalihokan sa mga illegal loggers sanglit dili naman unya makapalusot pa ang mga loggers sa ilang pinutol nga mga kahoy gikan sa dakbayan sa Bislig, Surigao del Sur, Agusan del Sur kansa matod pa dalhon ngadto sa Davao area.

Sukad gipakusgan ang kampanya batok illegal logging ning rehiyon, niubos matod pa ang ihap sa mga kahoy nga nakompiska diin sa tuig 2011, nakakompiska ang ahensya og 2,102,643.38 board feet; 1,575,468.64 board feet sa 2014; ug 117,823.90 board feet sa unang duha ka bulan ning kasamtangang tuig 2015.

Una nang gimandoan ni DENR Secretary Ramon Paje ang tanang regional directors sa ahensya nga adiser mapupos ang kasamtangang bulan, mawala na sa hingpit ang iligal nga pagpamutol sa kahoy sa matag rehiyon.