Siargao Island, Best Icon sa Caraga

Ni Alex Mapoy

DOT Caraga Regional Director Leticia Tan. Photo by

Alex Mapoy

BUTUAN CITY – Tinguha sa Department of Tourism (DOT) Caraga nga daling mailhan ang rehiyon sa natad sa turismo hinungdan gihimong icon sa ahensya ang Siargao Island.

Gipili sa ahensya ang maong isla gumikan sa dagkong event nga gihimo matag tuig sama sa International Surfing Competition, Siargao International Women’s Surfing Cup, ug daghan pang uban nga gisalmotan sa mga langyaw.

Kasagaran sa nangdayo nga mga turista ang Japan, Germany, Slovakia, Greece, England, Indonesia, Switzerland, Australia, ug daghan pang uban.

Sumala ni DOT Caraga Regional Director Leticia Tan, mas maayo nga ang maong isla maoy himuong “icon” sanglit pinaagi niini, mailhan usab ang ubang nindot nga mga lugar ning rehiyon nga angay dili sipyaton pagsuroy sa mga nahisgutan.

Dugang ni Dir. Tan, pinaagi sa pagpili sa Siargao isip icon sa rehiyon, mas dali lamang ma-promote ang rehiyon nga abunda kini sa mga lugar nga nindot kasuroyan. 

“Kon asa tong mga icons nato, we focus para kusog ang impact. Holistic na lang ang atong approach, if not, maglisod ta pag-promote,” pahayag ni Dir. Tan.

Una nang gipasigarbo sa opisyal ang tourist arrivals sa nakalabay’ng tuig nga nilansang sa “1.016 million” butang nga gikalipay pag-ayo sa nahisgutan.

Nagtimaan matod pa kini nga mas mo paspas ang kalamboan sa rehiyon sanglit alang kaniya, kon daghang turista, daghang negosyo usab ang mamugna ug niana, daghang trabaho ang mahimong ka sudlan sa mga Caraganons nga walay trabaho.

Alayon niini, kampante ang opisyal nga adiser mahuman ang kasamtangang tuig, mo doble ang tourist arrivals nga natala sa nakalabay’ng tuig.