Decarbonized Economy Ipahangop

Ni Alex Mapoy

DENR Caraga Regional Director Nonito M. Tamayo. Photo by Alex Mapoy

BUTUAN CITY – Angayang hangpon sa tanang lokal nga kagamhanan ang Decarbonized Economy sa ingon makabaton sa malahutayong ekonomiya nga dili madaut ang kinaiyahan.

Ilawom sa decarbonized economy, gamiton sa katawhan ang renewable sources sa enerhiya sama sa hydro, geothermal, wind, solar, ug bio-energy ingon man padayong mananom og mga kahoy nga dakong tabang pag-absob sa carbon dioxide ug greenhouse gases (GHG), segon ni Johny S. Natad sa Department of Environment and Natural Resources (DENR) Caraga.

Niining paagiha, malikayan matod pa ang bisan unsa mang porma sa katalagman nga mahitabo ning kalibotan kansang katalagman maoy bunga sa binuhatan sa tawo.

Sumala ni DENR Caraga Regional Director Nonito M. Tamayo, kon hangpon lamang kini sa katawhan, maluwas ang kalibotan gikan sa kakuyaw bunga sa nasinatiang “global warming” ug “climate change.”

Dugang ni Dir. Tamayo, kini lamang ang nakitang paagi nga pinaka-epektibo aron batokan ug makibhangan ang nasinatiang “global warming” nga maoy inanay nga niguba sa kalibotan.

Gitin-aw sa direktor, ang bag-ong mga paagi kinahanglan nang hangpon sa gikonsiderang “developing countries” aron inanay makab-ot ang tinguha nga “zero-­carbon” ug “climate-resilient societies.”

Pamugos sa opisyal, ang kaugmaon sa kalibotan mag-agad kini sa mahimong desisyon sa matag usa sanglit ang kausaban sa kalibotan magdepende sa binuhatan sa tawo.

Sa gihimong pagtuon sa mga eksperto, ang decarbonized economy, dili lamang makaluwas sa kalibotan gikan sa kadaut kondi makatabang usab kini nga makatigom sa halos 71 trilyones dolyares pag-abot sa tuig 2050.