Z Benefit Package Contract Gibuksan

Ni Alex Mapoy

PhilHealth Caraga Kenneth Po. Photo by Alex Mapoy

BUTUAN CITY – Gibuksan sa nasudnong kadumalahan sa Philippine Health Insurance Corporation (PhilHealth) ang kontrata nga mahimong aplayan sa “private health care institutions.”

Ang nahisgutang kontrata nagtumong nga masegurong mahatag ang nagtunhay nga Z Benefit Packages.

Gihimo kini isip kabahin sa gihingusgan ug gi-asdang nga kampanya sa ahensya, "Bawat Pilipino, Miyembro; Bawat Miyembro, Protektado; Kalusugan Natin, Segurado.

Sumala ni Kenneth Po sa PhilHealth Caraga, gimugna ang Z Benefit Packages aron matubag ang gitawag nga “catastrophic illnesses” o grabe nga matang sa sakit sama sa kanser sa totoy, kanser sa prostate, acute lymphocytic  leukemia, ventricular septal defect, tetralogy of fallot, coronary artery bypass graft, selected orthopaedic implants, ug daghan pang uban.

Dugang ni Po, tungod sa ka grabe sa maong mga sakit, nanginahanglan ang ahensya ug kaabag nga maserbisyohan ang miyembro nga naghambin niining matanga sa sakit.

Walay laing gitumbok sa opisyal nga mahimong kaabag sa programa mao ang mga pribadong ospital diin alang sa opisyal, mas daghang pribadong ospital nga mo tunol sa serbisyo, mas labing maayo sanglit mahatagan man dayon sa serbisyong medikal ang hingtungdang membro.

Nanghinaut matod pa si PhilHealth CEO ug kasamtangang Presidente Alexander A. Padilla, segon ni Po nga adiser mahuman ang kasamtangang tuig, aduna na silay maka-kontrata nga pribadong ospital nga dunay kakapas nga mo tunol sa serbisyong medikal pinasubay sa nakalatid sa Z Packages sa bisan asang dapit sa nasod.

Niadtong interesadong ospital, mahimo kining makig-alayon sa pinakaduol nga buhatan sa ahensya.

Sa pagkutlo ning balita, mokabat pa sa 17 ka mga pribadong ospital ang nisulod og kontrata sa ahensya alang sa Z Package Benefits.