Water Rationing Gikadismaya

Ni Alex Mapoy

BUTUAN CITY – Gikadismaya sa pipila ka konsumidor sa Butuan City Water District (BCWD) ang gihimong water rationing sa water district human wala na abtan sa rasyon.

Bisan pa man, dunay pipila ka mga konsimidor sama kang Ailyn Legazpi taga – Lower Mandacpan, Brgy. San Vicente ning siyudad ang nipahayag nga nalipay kini sa gihimong inisyatiba sa water district.

Sayod si Legazpi nga band-aide solution lamang matod pa ang maong water rationing, apan sa maong paagi, nabati matod pa sa katawhan ang paningkamot sa buhatan.

Apan sa facebook account sa water district, usa ka ginang ang nipadayag nga dili lang unta kutob sa water rationing ang himuon sa buhatan kondi malahutayong solusyon sa dugay nang problema sa tubig ang gipangita sa katawhang Butuanon.

Bugtong tubag ni BCWD Senior Public Relations Officer Ramil S. Barquin, gikasubo nila ang pagkawala sa suplay sa tubig dungan sa pagpangayo og dispensa sa kahasol kansang kahimtang sa panahon sa watershed area ang dili mapugngan dungan sa pagpaniguro nga doble kayod ang buhatan aron mabalik sa normal ang operisyon niini.

“BCWD is truly sorry for the inconvenience it has caused to its concessionaires. Rest assured that the BCWD is doubling its efforts to restore normal operations,” dispensa sa opisyal.

Dumduman nga daling nimando ang kadumalahan sa water district pinaagi ni General Manager Engr. Anselmo Sang Tian nga magpahigayon og water rationing pinaagi sa valving o kaha tanker aron dunay magamit nga tubig ang mga konsumidor nga wala na abtan sa suplay tungod sa kadaut sa panahon sa watershed area.

Kagahapon, dunay valving rationing gihimo sa amihanang bahin partikular na sa Bading, Buhangin, Dagohoy, Fort Poyohon, Holy Redeemer, Humabon, Leon Kilat, Limaha, Obrero, Ong Yiu, San Ignacio, Sikatuna, Tandang Sora, Agusan Pequeño, Ambago, Doongan, Libertad North, Lumbocan, Masao, Pagatpatan, ug Babag gikan alas-8:00a.m. hangtod alas-3:00p.m.

Samtang sa habagatang bahin, dunay gihimong valving rationing sa Agao, Bayanihan, Datu Silongan, Diego Silang, Golden Ribbon, Imadejas, JP Rizal, Lapu-Lapu, Maon, New Society Village, Rajah Soliman, Urduja, Bit-os, Bonbon, Libertad South, Pangabugan, San Vicente, ug Villa Kananga gikan alas-8:00 kagabii hangtod alas-3:00 kaganihang ka adlawon.

Sa tanker rationing, ang schedule Tanker 1 - June 30, 2015 (9:00a.m.) – Pagatpatan; Tanker 2 - June 30, 2015 (9:00a.m.) – Agusan Pequeño; ug Tanker 3 - June 30, 2015 (9:00a.m.) – Babag and Lower Doongan.

Samtang sa container rationing, L300 1 - June 30, 2015 (9:00a.m.) – Tambak, Lower Doongan; L300 2 - June 30, 2015 (9:00a.m.) – Tambak, Lower Doongan; ug Mini Dump Truck – June 30, 2015 (9:00a.m.) – Tambak, Lower Doongan.

Ang gi-suplay nga tubig sa tanker rationing ang gikan kini sa Pump Station No. 1 sa BCWD. Gitambagan usab ang katawhan nga pabukalan ang tubig kon kini imnon aron mahimo kining luwas nga gamiton.