MOA Ayuda sa Mag-uuma Gipermahan

Ni Alex Mapoy

Courtesy of Sonny T. Montilla

AGUSAN DEL NORTE – Gipaneguro sa probensyal nga kagamhanan sa Agusan del Norte nga tabangan ug panalipdan ang mga mag-uuma sa probensya.

Subay niini, gisudlan ni Gov. Ma. Angelica Rosedell Amante – Matba ang kasabotan tali sa Philippine Crop Insurance Corporation (PCIC) pinaagi sa pagperma sa Memorandum of Agreement (MOA) alang sa pagpatuman sa Comprehensive Insurance Protection sa agri-fishery projects ug uban pang mga programa pang-agrikultura.

Sumala ni Aimee B. Sienes, nigahin ang probensya og balor P500,000  kansang pundo kuhaon gikan sa 5% sa Local Risk Reduction Management Fund (LRRMF) alang sa nasangpit nga programa.

Dugang ni Sienes, bahinon ka upat ang maong pundo diin tag - P125,000 ang idapat alang sa corn, rice, livestock, ug fishery products.

Magsilbing pilot municipalities sa maong programa alang ning tuiga ang lima ka mga lungsod sa probensya nga naglangkob sa Las Nieves, RTR, Magallanes, Jabonga, ug Buenavista samtang sa sunod tuig, makapahimulos niini nga programa ang mga lungsod sa Carmen, Nasipit, Tubay, Santiago, Kitcharao, apil ang dakbayan sa Cabadbaran.

Gidasig usab matod pa ni PCIC Corporate Business Affairs Group Vice President Antonio S. Uy ang mga piniling opisyal sa probensya nga tabangan ang mga mag-uuma nga makabawi sa ilang pananom labi na kon kini maapektohan sa bisan unsa nga matang sa kalamidad.

Si PCIC – 10 Regional Manager Atty. Rosa M. Gatinao nagbutyag nga andam ang ilang ahensya pagtabang sa mga mag-uuma pinaagi sa gimugnang agricultural insurance protection program.

Alayon niini, dako ang kalipay sa mga Agusanon nga pinaagi sa maong gisudlan nga kasabotan sa inahan sa probensya, mahatagan og kasegurohan ang ilang pananom labi na pag-abot sa kalamidad.