Nasuko Wala Gitagayan Gitigbas

Ni Alex Mapoy

TANDAG CITY – Parehong nadala sa tambalanan ang biktima ug ang suspetsado human parehong nakaangkon og samad tinigbasan adtong Sabado, alas-8:00 ang takna sa gabii.

Naila ang biktima nga usa ka Max Quezada Magallanes alias “Balong”, 30 anyos, minyo samtang ang suspetsado mao si Danny Cabaltera Solis.

Sa imbestigasyon sa kapulisan sa Tandag City Police Station, nag-inom matod pa ang suspetsadong si Danny ug ang uyoan niining si Garet Solis sa tindahan nga gipanag-iyahan ni Rosalie Velasco.

Kamulo og tagay ang duha, kalit niabot si Max sa nahimutangan sa mga nahisgutan.

Wala matod pa gitagayan si Max ni Danny hinungdan kini nasuko ug nanghagad og sinumbagay.

Gikaingong impluwensiyado sa ilimnong makahubog adtong higayona si Max dihang kini nanghagit sa mag-uyoan.

Dihang nadungog ni Danny ang pagpanghagit ni Max, kalit kining nibiya sa ilang nahimutangan ug pagbalik, duna na kini bitbit nga sanggot dayong panigbas tumong sa lawas ni Max.

Nagkadugo ang lawas ni Max human nakaangkon og daghang samad tinigbasan hinungdan nga dali kining gidala ngadto sa Adela Serra Ty Memorial Medical Center aron katambalan.

Ang suspetsado usab nga si Danny, lakip nga gidala sa samang tambalanan human naunay pagtigbas ang walang tiil.

“Further investigation tells that Max Magallanes was angry with the suspect when Solis did not offer him a drink. Both victim and suspect were believed to be under the influenced of liquor,” tipik sa imbestigasyon sa kapulisan.

Nahitabo ang insidente sa Purok Paglaom, Sitio Linob, Barangay Pandanon, dakbayan sa Tandag sakop sa probensya sa Surigao del Sur.

Basi sa imbestigasyon, pulos impluwensiyado sa ilimnong makahubog ang duruha hinungdan nga nisangko sa duguong hitabo ang pagpanghagad og sinumbagay sa biktimang si Max.

Sa pagkutlo ning balita, pursigido matod pang mo pasaka og kaso ang biktimang si Max batok na sa suspetsadong si Danny.