Mayor Jun, Suportado sa Kaliwatan

Ni Alex Mapoy

Agusan del Norte Gov. Ma. Angelica Rosedell M. Amante - Matba nipasalig nga padayong paluyohan sa pamilyang Amante si Butuan City Mayor Dr. Ferdinand "Jun" Amante sa aspetong pulitika. Photo by Alex Mapoy

AGUSAN DEL NORTE – Gipaneguro sa inahan sa probensya sa Agusan del Norte nga padayong suportahan sa pamilyang Amante si Butuan City Mayor Dr. Ferdinand “Jun” Amante.

Sumala ni Agusan del Norte Gov. Ma. Angelica Rosedell M. Amante – Matba dihang nahinabi sa mga tigbalita, padayong paluyohan ug suportahan sa pamilyang Amante nga anaa sa probensya nanimuyo kon unsay plano sa kasamtangang mayor sa dakbayan sa Butuan labi na sa natad sa pulitika.

Gi-angkon ni Gov. Matba, bisan dili sila magka-estorya ni Mayor Jun, apan, wala kini nagpasabot nga ang suporta sa pamilyang Amante sa Agusan del Norte, wala na kaniya.

Pamugos sa gobernadora, padayong suportahan sa kaliwatan sa Amante ang kasamtangang mayor ning siyudad kon unsay plano niini sa pulitika.

Gipaneguro usab sa opisyal, pabiling gipaluyohan sa iyang maguwang nga si Agusan del Norte 2^nd District Cong. Erlpe Amante si Mayor Jun sa bisan unsa niining tinguha labi na sa pulitikanhong hisgotanan.

“Ang dugo, dugo gyud at all cost. Bisan dili mi mag-estoryahan ni Manong Jun – the mayor of Butuan City, kon unsay plano niya politically, ang tibuok pamilya niya sa Agusan del Norte, sa probensya, including my brother, Mano Erlpe will be behind him,” paneguro ni Gov. Matba.

Sa pagkutlo niini nga balita, walay komento ang amahan sa dakbayan sa Butuan kabahin sa gipanegurong suporta sa kaliwatang Amante sa probensya sa Agusan del Norte.