Tubig sa Agusan, I-suplay sa Butuan?

Ni Alex Mapoy

BCWD Senior Public Relations Officer Ramil S. Barquin. Photo by
Alex Mapoy

BUTUAN CITY – Wala gisalikway sa liderato sa Butuan City Water District (BCWD) ang posibilidad nga mahimong alternatibong tinubdan sa tubig ang Agusan river.

Gikabutyag ni BCWD Senior Public Relations Officer Ramil S. Barquin, mahimong alternatibong tinubdan sa tubig sa water district ang Agusan river, apan nanginahanglan kini og dakong kantidad aron mahatagan kini og katumanan.

Dugang ni Barquin, kon ugaling ang tubig sa Agusan river maoy i-suplay sa tibuok siyudad, nanginahanglan kini og mahalong ekipos aron masala pag-ayo ang tubig gikan sa maong suba ug luwas nga konsumohon sa katawhang Butuanon.

Wala usab nalilong ni Barquin nga ang maong suba kontaminado kini sa mercury tungod sa kemikals nga nisagol sa suba gikan sa pipila ka minahan nga nag-opereyt duol sa maong suba.

Kon ugaling konsumohon ang tubig sa maong suba, kinahanglan matod pang tanggalon ang maong kemikal ug salaon pag-ayo aron dili madaut ang panglawas sa mga konsumidor.

Kasamtangan, ang maong alternatibo sa tinubdan sa tubig ang hanap pa kining mahatagan og katumanan, matod sa opisyal sanglit nanginahanglan kini og dakong pundo.

“Puwede man siya. Pero, lisod ang process ana kay desalination mana siya. Kinahanglan na og mahal nga ekipo labi na nga kontaminado kini sa mercury, unsaon pagtangtang niana? Posible mana siya pero kinahanglan mana siya og dakong investment. Pero, dili nato makaya sa pagkakaron. So, hanap pa na sa pagkakaron nga mahitabo,” pagklaro ni Barquin.

Dumdoman nga dihang nakabisita si Davao City Mayor Rodrigo Duterte dinhe sa siyudad, atol usab nga nakasinati og krisis sa tubig ang dakbayanan, niklaro ang opisyal nga kon siya maoy mayor ning siyudad, dili angayan nga ika-problema ang tinubdan sa tubig sanglit dako ang suba sa Agusan nga mahimong kakuhaan sa bultong tubig aron i-suplay sa tibuok siyudad matag adlaw.