Accomplishment Rate sa Water Project Gikalipay

Ni Alex Mapoy

Kasamtangang hulagway sa Public-Private Partnership (PPP) Treated Bulk Water Project nga nahimutang sa Sitio Iyao, Brgy. Anticala ning siyudad. Photo credit to BCWD

BUTUAN CITY – Gikalipay sa pipila ka mga konsumidor sa Butuan City Water District (BCWD) human nahibaw-an ang pinakaulahing kahimtang sa Public Private Partnership (PPP) Treated Bulk Water Project nga nahimutang sa Sitio Iyao, Brgy. Anticala ning siyudad.

Una nang gikataho ni BCWD Senior Public Relations Officer Ramil S. Barquin nga subay sa gihimong inspeksyon sa grupo sa Board of Directors (BODs) ug tagdumala sa water district sa pagpanguna ni General Manager Engr. Anselmo L. Sang Tian ning nakalabay’ng adlaw, anaa na sa 58% ang accomplishment sa pagmuntar sa dam samtang 98% usab nga accomplishment sa sand filtration facility.

Subay niini, gipahayag ni Tatay Orly, usa ka traysikol driver nga gikalipay niya ang bag-ong katikaran sanglit pipila na lamang ka bulan nga mag-antos ang mga Butuanon sa pagkawala sa suplay sa tubig panahon sa ting-ulan.

Mismo si Tatay Orly nagkanayon nga dako og kawad-on sa iyang kabahinan kon mawala ang suplay sa tubig sa water district sanglit makuhaan ang gamay niining kinitaan sa pagpamasahero gumikan kay ipalit niya kini og mineral water aron dunay ikadung-ag ug ikaligo sa iyang tulo ka mga estudyante.

Daan nang gisaad sa kadumalahan sa Taguibo Aquatic Solutions Corporation (TASC) nga paningkamotan niining matilawan ang ilang serbisyo karong Disyembre sa kasamtangang tuig.

Gitin-aw ni Barquin, ang nahisgotang proyekto maoy maghatag sulbad sa dugay nang problema sa water district labi na panahon sa ting-ulan ug paghinay sa presyur sa tubig, panahon sa ting-init.

“As far as the BCWD is concerned, the PPP project for Water Treatment and Bulk Water Supply will ultimately solve not only the recurrence of water supply interruption during rainy days but also low volume of water during long drought,” pagtin-aw ni Barquin.