Lig-ong Relasyon Gipaagi sa Clean-Up Drive

Ni Alex Mapoy

CLEAN-UP DRIVE: Ni-abag ang mga opisyales sa Brgy. San Vicente lungsod sa Jabonga Agusan del Norte ingon man ang mga benepisyaryo sa 4Ps sa pagpanghinlo sa baybayong bahin. Photo courtesy of Jabonga MPS

JABONGA, Agusan del Norte – Serye nga clean-up drive ang gipahigayon sa mga personahe sa Jabonga Municipal Police Station ngadto sa kabaranggayan sakop sa naasoy’ng lungsod.

Unang gihinloan sa kapulisan ang Brgy. San Vicente sakop sa maong lungsod inabagan sa Barangay Local Government Unit (BLGU) sa nasangpit nga barangay nga gipangunahan ni Kapitana Marlene E. Beluan.

Nilambigit usab ang mga benepisyaryo sa Pantawid Pamilyang Pilipino Program (4Ps) sa nasangpit nga kalihokan.

Gawas niana, nagpahigayon usab og clean-up drive ang kapulisan sa National Highway, Brgy. Libas sa maong lungsod.

Ang nahisgotang kalihokan gihimo subay sa pagpanguna ni Police Inspector Danilo S. Cabug-os, ang hepe sa kapulisan sa maong munisipyo.

Gihimo sa kapulisan ang maong aktibidad isip pagselebrar sa 20^th Police Community Relations Month diin naningkamot ang kadumalahan ni PI Cabug-os nga mapaduol ang kapulisan sa komunidad.

Nakita sa opisyal nga usa kini sa mga paagi nga mahimong duol sa dughan ang katawhan sa kapulisan ug mas mo lig-on ang pagsalig sa mga residente sa maong lungsod ngadto sa han-ay.

Ang isa ka bulan nga selebrasyon gisabak sa tema, “Matibay na Ugnayan ng Mamayan at Pulisya, Simbolo ng Kapayapaan at Kaunlaran ng Sambayanan.”