Donated Blood Kontaminado sa HIV

Ni Alex Mapoy

Proseso sa pagkuha og dugo diin kuhaan ang blood donor ug ang dugo nga makuha, ipailawom sa screening test aron masuta kon luwas ba kining i-abuno ngadto sa nanginahanglang pasyente. Photo by Alex Mapoy

BUTUAN CITY – Gikomperma sa kadumalahan sa Philippine Red Cross Agusan del Norte – Butuan City Chapter nga pipila ka bag sa dugo nga nakolekta sa buhatan gikan sa mga blood donors ang nagpositibo sa makatakod nga sakit sulod ning tuiga.

Nahibaw-an kini human gipailawom sa screen test ang tanang nakolektang dugo diin pipila ka bag sa dugo ang kontaminado.

Gipasabot ni PRC Agusan del Norte – Butuan City Blood Center In-Charge Dan Mark B. Moral, tanang makolekta nga dugo gikan sa mga blood donors ang ipailawom kini sa screening test.

Katuyoan niini nga masegurong luwas o dili kontaminado sa makatakod nga sakit ang dugo nga i-abuno ngadto sa nanginahanglang pasyente.

Sa HIV, naa man tay mga confirm. Amo na man na siyang gi-refer sa Hack Team sa City Health, pagkomperma ni PRC Agusan del Norte – Butuan City Blood Center In-Charge Dan Mark B. Moral. 

Ang dugo nga masutang kontaminado sa makatakod nga sakit sama sa Hepa B, Hepa C, HIV, malaria, ug sipilis ang itugyan kini sa buhatan ngadto sa Hack Team sa Butuan City Health Office ug ang maong team na maoy sekreto nga makig-alayon sa hingtungdang blood donor.

Dugang ni Moral, kini maoy pa ingnan sa kolektahong processing fee sa dugo nga kantidad og P1,800.

Gitin-aw sa opisyal, tanang dugo nga na gikan sa ilang buhatan nga gi-abuno ngadto sa nanginahanglang pasyente ang limpiyo ug dili kontaminado sa makatakod nga sakit sanglit ang kontaminadong dugo ang atua naman kini sa Butuan City Health Office.

“Karon nga tuig, ang atong dugo nga gipang-kolekta, ato man gyud nang i-screening test para sa mga sakit, Hepa B, Hepa C, HIV, malaria, ug sipilis. So, naa pud tay mga dugo nga confirm nga naa gyuy mga infected. So, sa HIV, naa man tay mga confirm, amo na man na siyang gi-refer sa Hack Team sa City Health. Sila na ang gi-forward ngadto sa City Health sa Hack Team,” pagkomperma ni Moral.

Sa pagkutlo ning balita, dili mahatag sa opisyal ang kompletong detalye sa pipila ka blood donors nga dunay makatakod nga sakit sanglit confidential kini diin ang bugtong maseguro sa opisyal nga babae ug lalaki ang maong mga donors.