Civil Service Exam sa Dominggo Na

Ni Alex Mapoy

Imelda O. Bongabong of CSC Caraga

BUTUAN CITY – Dul-an 10,000 ka mga indibidwal ang mo kuha sa professional ug sub-professional examination sa Civil Service Commission (CSC) karong Oktobre 18, 2015, adlaw’ng Dominggo.

Sa opisyal nga record sa CSC Caraga nga gihikyad ni Imelda O. Bongabong, mokabat sa kinatibuk-ang 8,067 ka mga indibidwal ang mo kuha sa eksaminasyon diin 7,212 ang alang sa professional samtang 855 sa sub-professional.

Tungod sa maong gidaghanon, upat ka mga Examination Centers ang gimuntar sa rehiyonal nga buhatan nga naglangkob sa Agusan National High School alang sa mga examinees nga na gikan sa Agusan del Norte ug dakbayan sa Butuan; Surigao State College of Technology (SSCT) alang sa professional samtang Surigao Norte National High School alang sa sub-professional para sa mga examinees nga na gikan sa dakbayan sa Surigao ug Surigao del Norte; De La Salle John Bosco College alang sa mga examinees sa Surigao del Sur ug dakbayan sa Bislig; ug Agusan del Sur National High School nga nahimutang sa lungsod sa San Francisco.

Tambag sa opisyal sa tanang mo kuha sa nahisgotang mga eksaminasyon, mas maayo nga mag-rebyu kini sa mga leksyon ug makisayod sa pinakaulahing panghitabo sa palibot aron kini makatubag sa pagakuhaong eksam.

Gawas niana, angayang susihon nang daan sa mga nahisgotan ang testing area, isa ka adlaw adiser ang eksam sa ingon dili na kini magpunay pa og pangita sa gi-assign nga classroom sa adlaw mismo sa eksam.