Watershed Namiligro; Pagpakabana Gipanawagan

Ni Alex Mapoy

BUTUAN CITY – Anaa na sa peligro nga kahimtang ang Taguibo Watershed hinungdan nga angay na nga magpakabana ang katawhan.

Sa mensahe ni Agusan del Norte First District Representative Lawrence Lemuel H. Fortun atol sa tigom sa Philippine Institute of Certified Public Accountants Butuan City – Agusan del Norte Chapter ug Association of CPAs in Mindanao (ACPAMIN) sa Balangay Hotel and Convention Center ning siyudad adtong Huwebes, ni-apela ang kongresista nga magpakabana sa isyu sa watershed.

Gikabutyag ni Cong. Fortun, namiligro na ang tinubdan sa tubig sa watershed ug kon dili kini mahatagan sa pagtagad, dili lang masinatian sa katawhang Butuanon ang krisis sa tubig sulod sa pipila ka mga bulan kondi sulod pa sa pipila ka mga katuigan.

“We must not forget the real the problem, the huge elephant in the room. Our potable of water is at danger, and if we continue to render little attention to this real problem, we might witness a waterless Butuan not for months, but for years,” pahayag ni Cong. Fortun.

Una nang nanawagan ang magbabalaud ngadto sa lokal nga panggamhanan ning siyudad nga angay nang ipatuman ang napanday niadto nga Butuan City Watershed Code nga maoy maghatag kagahom pagtukod sa Butuan City Management Council.

Gituohan sa naulahi nga kon mapatuman lamang ang maong balaud, mas matutukan ang pagpanalipod ug pag-amping sa watershed aron maseguro nga dili madaut ang tinubdan sa tubig latas sa katuigan.

Nanghinaut ang opisyal nga uban sa tabang sa PICPA Butuan – Agusan del Norte, maluwas ang watershed gikan sa peligrong hatod sa mapasipad-ong indibidwal.