Hustisya sa Lumad Gisinggit

Ni Alex Mapoy

BUTUAN CITY – Dose mil (12,000) ka mga katawhang nagpakabana sa Caraga ang nagkahiusa pagmartsa sa pipila ka mga dalan ning siyudad ug seryoso nga gipaabot ang ilang demanda ngadto sa gobernong Aquino aron mahatagan og hustisya ang mga biktima sa kabangis sa grupong Bagani Forces adtong Sabado.

Hisayran nga kapin 40 ka adlaw na ang nilabay dihang brutal nga gipatay sa mga membro sa Bagani Forces sila Alternative Learning Center for Agricultural and Livelihood Development (ALCADEV) Executive Director Emerito “Emok” Samarca, Malahutayong Pakigbisog Alang sa Sumusunod (MAPASU) Lider Dionel Campos, ug Datu Juvello Sinzo, apan wala pa nadakpan ang mga gitudlong mamumuno.

Nagpahigayon na og Senate Probe lambigit sa Lumad Killings sa Surigao, apan, hangtod karon, pabilin pang gawasnon ang mga kriminal taliwala nga gipagawas na ang kamandoan sa hinanaling pagsikop nila Bobby Tejero, Loloy Tejero, Gareto Layno, ug laing 20 ka mga kaubanan kinsang pangalan ang padayon pang giila.

Gipasibaw sa liboang katawhan ang ilang kadismaya dungan sa pagduso sa ilang mga demanda nga dakpon ug taralon ang armadong kriminal nga nipatay sa mga biktima; bawian sa gihuptang armas ug bungkagon ang armadong grupo nila Bocales – Belandres – Egua ug daghan pang uban; patubagon ang mga yunit sa militar nga matod pa sa militanteng grupo maoy nag-organisa ug naghatag armas sa nasangpit nga grupo; ihunong ang test mission sa kasundalohan sa kabukiran sa Surigao del Sur; ihunong ang matod pa bangis nga Oplan Bayanihan; ug labaw sa tanan, ihunong ang hag-as ug dili makitawhanon nga pagpatay ngadto sa mga lumad.

Sa opisyal nga pamahayag sa MAPASU ug KASALU, ilang gi-kwestyon ang kawala matod pay aksyon sa mga awtoridad human nakita sa komunidad sa mga lumad nga libreng naglakaw-lakaw ang mga kriminal.

Gi-alegahan sa grupo nga gikuyog pa sa militar ang mga kriminal sa pagpahigayon og operisyon sa kabukiran kansa dayag matod pa nga gipanalipdan sa militar ang mga kriminal.

“Niabot nalang ang 40 ka adlaw, ang mga kriminal nga sila Loloy Tejero, Garito Layno, Bobby Tejero ug mga kaubanan nilang armado ang libreng naglakaw-lakaw sa mga komunidad. Si Marcial Belandres nga usa sa ilang mga lider, libreng nagsuroy-suroy nga dunay military escort sa Manila. Sila Marcos Bocales, Calpet Egua, Hasmin Acevedo ug ilang mga alipures naa ra sa ilang mga bangag sa kampo sa militar, ang uban kanila nag-uban-uban sa operisyong militar sa bukid, samtang padayon pang nagbangotan ang mga minahal-sa-kinabuhi sa ilang gipatay ug nag-antus sa bakwitanan ang mga komunidad nga padayon pa nilang gihulga hangtud karon,” pahayag sa MAPASU ug KASALU.