Butuanon Daghang Nag-abroad

Ni Alex Mapoy

NAPUGOS. Bisan sakit nga mahilayo sa minahal sa kinabuhi, apan napugos ang mga Butuanon pag-aplay og trabaho sa abroad human wala nakakita og saktong trabaho dinhe sa siyudad

BUTUAN CITY – Daghan sa mga Butuanon ang nangaplay og trabaho ngadto sa gawas sa nasod kon itandi sa ubang mga siyudad ug kalungsoran nga sakop ning rehiyon sa Caraga.

Sa datos nga gipagawas sa Philippine Overseas Employment Administration (POEA) Caraga, nanguna ang siyudad sa Butuan nga dunay pinakadaghan nga ni-abroad aron lamang mahatagan og maayong kaugmaon ang nahibiling pamilya.

Makita sa datos gikan Marso 2, 2014 hangtod Nobembre 19, 2015, ang dakbayan sa Butuan dunay 20 ka buok nga ni-abroad, nagsunod ang Agusan del Norte nga dunay 17 ka buok, 6 sa siyudad sa Cabadbaran, 3 sa Surigao del Sur, 2 sa Surigao del Norte, tag – 1 sa dakbayan sa Bayugan ug Surigao.

POEA Caraga Labor & Employment Officer
 III Ritchel M. Butao

Sa kinatibuk-ang 48 nga ihap, 34 niini mga lalaki samtang 16 mga babae.

Gikabutyag ni POEA Caraga Labor & Employment Officer III Ritchel M. Butao, diyutay lamang ang maong ihap sanglit wala gi-apil sa kwentada sa rehiyonal nga buhatan kadtong mga Caraganon OFWs nga gikonsiderang balikbayan.

Dugang ni Butao, mayorya sa mga ni-abroad mao kadtong mga professional ug skilled workers.

Usa sa nakita nga mga hinungdan sa opisyal nganong daghan nga Caraganon ang napugos paglangyaw sanglit gawas nga gamay kaayo ang sweldo, wala usab kaayoy kasudlan nga trabaho.