Kreminalidad sa Caraga, Misaka

Ni Alex Mapoy

BUTUAN CITY – Taliwala sa paningkamot sa Philippine National Police (PNP) Caraga nga makibhangan ang ihap sa kreminalidad sa rehiyon, apan, padayon pa gihapon nga misaka ang rata sa kremin ning rehiyon.

Sa datos sa National Economic Development Authority (NEDA) Caraga adtong 2014, mi-ubos ang kreminalidad sa Agusan del Norte, Surigao del Norte, ug Surigao del Sur, apan, nabira ang rata sa kreminalidad sa rehiyon pa taas tungod sa pagsaka kremin sa dakbayan sa Butuan ug Agusan del Sur.

Tuig 2014, niubos og 17.78% ang crime rate sa Agusan del Norte, 11.03% ang giubos sa kremin sa Surigao del Norte, ug 1.77% ang gi-ubos sa kremin sa Surigao del Sur. Samtang, 150.31% ang gisaka sa crime rate sa Butuan ug 67.99% ang gisaka sa kreminalidad sa Agusan del Sur.

Ang pagsaka sa kreminalidad sa siyudad sa Butuan ug Agusan del Sur maoy nipataas sa kremin sa rehiyon.

Sa kwentada sa PNP, nisaka og 24.50% ang crime rate sa 2014 nga dunay kinatibuk-ang ihap nga 16,829 ka buok kremin samtang sa 2013, ang kremin anaa lamang sa 13,517.

Sa 100% nga crime rate, 29% ang natala sa dakbayan sa Butuan, 25% sa Surigao del Norte, 21% sa Surigao del Sur, 16% sa Agusan del Sur, 7% sa Agusan del Norte, ug 2% sa Province of Dinagat Islands (PDIs)

Kon ihap sa kremin ang hisgotan, ang dakbayan sa Butuan sa tuig 2014 dunay 4,831 ka buok kremin nga natala, 4,258 sa Surigao del Norte, 3,555 sa Surigao del Sur, 2,619 sa Agusan del Sur, 1,142 sa Agusan del Norte, ug 424 sa PDIs.

Alayon niini, naningkamot ang awtoridad nga mapasulbad ang nahisgotang mga kaso pinaagi sa pagpahigayon og Criminal Investigation Course (CIC) aron mahatagan og igong kahibalo ang mga imbestigador alang sa mas paspas nga kasulbaran sa gihuptang kaso uban sa paninguha nga mo ubos ang ihap sa kreminalidad ning kasamtangang tuig 2015.