Hulagway sa Lumad Killers, Gipagawas

Ni Alex Mapoy

Sila ang Tejero brothers kinsa gitudlong nihimo sa September 1 Lumad Killing. Ang mga nahisgotan pulos dunay patong sa ulo nga tag - P1,200,000.00

SURIGAO DEL SUR – Gipagawas sa Surigao del Sur Police Provincial Office (SDSPPO) ang hulagway sa gikonsiderang top 10 Most Wanted Person diin apil niini ang hulagway sa gibansagang Lumad Killer sa probensya adtong Lunes.

Ang hulagway nila Bobby Tejero, Loloy Tejero ug Garito Layno ang nagbansiwag na sa bisan asang dapit kansang tuyo nga madakpan gilayon ang mga nahisgotan aron manubag sa salaud nga nahimo.

Kahibaloan nga pulos dunay patong sa ulo nga tag – P1.2 milyon kinsa maoy nanguna sa mga pinangita sa balaud sa naasoy’ng probensya.

Nag-atubang ang mga nahisgotan sa tag-tulo ka ihap sa kasong murder, grave coercion, ug arson.

Langkob usab sa napulo nga pinangita sa balaud sila Mario “Loloy” Intrina kinsa nag-atubang sa kasong murder ug homicide; Ambrosio B. Montañez, Jr., kinsa nag-atubang sa kasong murder ug homicide; Memec Basao, Arturo Omba, ug Larry Omba pulos nag-atubang sa kasong pagpatay; Ventura Cotic alias James Umali kinsa nag-atubang sa kasong frustrated murder ug attempted murder; ug Rodulfo Manlantao kinsa nag-atubang sa kasong pagpanglugos.

Sa napulo ka mga pinangita sa balaud, unom lamang ang dunay hulagway hinungdan nga lisod pa gihapon ilhon ang upat ka mga wanted sanglit wala kini hulagway nga nakabutang.

Niadtong makakita sa bisan asa ato nga panagway, mahimong i-sekreto pagtaho ngadto sa pinakaduol nga presento sa pulis o kaha direktang mo pahibalo sa SDSPPO hotline ang 0910-0900-375 sa SMART ug 0996-9590-253 sa GLOBE.