Budget Giusbawan, Responsibilidad Nadugangan

Ni Alex Mapoy

DENR Caraga RD Nonito M. Tamayo

BUTUAN CITY – Mipahimangno na ang liderato sa rehiyonal nga buhatan sa Department of Environment and Natural Resources (DENR) Caraga sa tanang kadagkoang opisyal sa matag dibisyon sa ahensya nga iseguro ang de kalidad nga serbisyo ning tuiga 2016.

Hisayran ang budget ning tuiga sa maong ahensya misaka og 60 porsyento (60%)kon itandi sa nakalabay'ng tuig 2015.

Sumala ni DENR Caraga Regional Director Nonito M. Tamayo, ang dako nga budget nga gigahin sa nasudnong kagamhanan angayan nga ipatuman sa husto ug ni bisan usa ka sentimo, dili sayangan.

Dugang ni Tamayo, mapakita lamang matod pa nga de kalidad ang serbisyo pinaagi sa pagkab-ot sa tanang targets.

Gitin-aw sa direktor, ang pagdako sa budget nagtimaan nga madugangan ang responsibilidad sa matag usa hinungdan angayan nga magtinabangay ang matag usa.

“I would like to remind everyone that as early as today we should focus on giving the best service to the public by effectively delivering our targets. 2016 is a year full of transformation and additional responsibilities. We have a 60% higher budget for 2016 than this year. Let us not put this to waste and put value to every cent,” pahayag ni Tamayo.

Malaumon ang opisyal nga ang umaabot nga tuig mahimong mabungahon pinaagi sa pagpatuman sa nakahan-ay nga mga programa.