Lumad Dismayado sa Goberno

Ni Alex Mapoy

BUTUAN CITY – Sangko sa langit ang gibati nga kadismaya sa sektor sa mga lumad ning rehiyon sa Caraga human wala paminawa ang singgit sa katawhan kabahin sa inhustisya.

Gikabutyag ni Datu Magno Limbasan sa tribong Manobo nga imbes paminawon sa gobernong Aquino ang ilang yangongo, pasanginlan naman hinuon matod pa sila nga kaabin sa mga rebelde.

Dugang ni Datu Limbasan, dili makatarunganon ang gihimo sa kasamtangang kagamhanan inay dunggon ang ilang sentiment ug tabangan nga masilotan ang mga kreminal nga hag-as nga mipatay sa pipila ka mga lideres sa lumad, gisumbalik naman hinuon sila og akusasyon.

Sumala ni Karapatan Agusan del Norte Chairman Fr. Jourlie Carlos, nagpasagad ang pang-goberno ni Aquino sa interes sa mga lumad ning rehiyon sanglit ang interes matod pa sa mga kapitalista maoy gidapigan.

“Buta ug bungol ang rehimeng US-Aquino sa singgit sa katawhan sa Caraga alang sa hustisya. Buta kini sa kamatuoran nga ang dagkong kapitalista, agalong yutaan ug mga adunahan lamang ang nakabenepisyo ug naharuhay sa pagrespeto sa tawhanong katungod. Bungol kini sa mga panawagan alang sa kalinaw ug hustisya sa daghang mga biktima sa paglapas sa tawhanong katungod. Wala kini’y pagbati sa kalisod sa mayorya sa katawhang Pilipino, sa sakripisyo sa inadlaw-adlaw nga pagpakabuhi ilalom sa katilingban diin gipihig ang mga kabus, gidaugdaug ug gipahimuslan ang mga walay gahom sa ekonomiya ug pulitika,” tipik sa pamahayag ni Fr. Carlos.

Ang maong sentimento maoy nagdasig sa mga lumad ug sa mga nagpakabanang sektor sa katilingban nga isaulog ang ika-67 ka tuig nga anibersaryo sa Declaration of Human Rights (UN UDHR) pinaagi sa martsa-rally.

Hugot nga gikondina sa grupo ang bangis nga buhat sa gobernong Aquino diin ilawom matod pa sa kasamtangang administrasyon, mokabat sa 21 ka buok ang namatay diin 12 niini mga mag-uuma ug 9  ang mga lumad kinsang mga biktima napatay subay sa Oplan Bayanihan nga programa sa kagamhanan.

Sa maong ihap, unom matod pa ang direktang gipatay sa mga sundalo subay sa gihimong operisyon sa kabukiran samtang 12 ang gipatay sa mga armadong bandidong paramilitar.

Bunga sa pagpamatay, liboan ka mga lumad ang mibakwit samtang ubay – ubay ang nawad-an sa minahal sa kinabuhi.

Alang sa mga nahisgotan, hustisya lamang ang ilang gipangayo alang sa mga biktima sa inhustisya, apan hangtod karon, wala pay nasilotan.