Caraganon OFWs, Padayong Nisaka

Ni Alex Mapoy 

POEA Caraga Senior LEO Coordinator
Meriam R. Balmocena 

BUTUAN CITY – Duha na ka mga ahensya sa gobernong buhatan ang nikomperma nga padayong nisaka ang ihap sa mga Caraganon nga nanarbaho sa gawas sa nasod.

Gilangkoban kini sa Philippine Overseas Employment Administration (POEA) Caraga ug Overseas Workers Welfare Administration (OWWA) Caraga.

Sumala nila POEA Caraga Senior LEO Coordinator Meriam R. Balmocena ug OWWA Caraga Account Austin V. Bade, padayon nga nagkataas ang ihap sa mga Caraganon nga migawas aron didto manimpalad.

OWWA Caraga Account Austin V. Bade

Base sa datos gikan sa POEA Caraga, kon basehan lamang ang datos sa mga OFWs nga nagproseso sa ilang buhatan partikular na niadtong mga bag-ohan, milansang sa 50 ka buok ang niproseso ug nilangyaw.

Sa kinatibuk-ang ihap, pinakadaghan taga – Butuan nga niabot sa 20 ka buok, gisundan kini sa taga – Agusan del Norte nga dunay 17 ka buok, ug nagsunod gilayon ang siyudad sa Cabadbaran, Surigao del Sur, Surigao del Norte, ug siyudad sa Surigao.

Ang maong ihap, wala naglakip sa mga Balikbayan Manggagawa nga nagproseso sa buhatan.

Gitin-aw sa mga nahisgotan, kon kuhaon ang kinatibuk-ang datos sa mga Caraganon OFWs kinsa sa laing rehiyon nagproseso labi na sa kaulohang Manila, gamay lamang ang 50 ka buok.