Druga, Makadaut sa Lawas

Ni Alex Mapoy

Campaign paraphernalia sa PDEA Caraga

BUTUAN CITY – Gipamugos sa kadumalahan sa Population Commission (PopCom) Caraga nga walay mahatag nga kaayohan sa panglawas ingon man sa kaugmaon sa tawo ang druga.

Hisayran nga daghang kabatan-onan o bisan mga edaran ang nagpakabuang sa drugas tungod sa sayop nga pagtuo nga ang druga dunay ikahatag nga kaayohan sa lawas.

Sumala ni PopCom Caraga Information Officer II Angie Balen – Antonio, bisan gamay, walay mahatag nga kaayohan ang druga sa lawas sa tawo, hinono-a, makaguba pa kini sa maayong ugma.

Dugang ni Antonio, kasagaran ra ba sa mga adik, dili matiguwang sanglit sayo sila nga mamatay.

Subay niini, gitambagan sa opisyal ang kabatan-onan nga likayan ang paglambigit sa druga ug mas maayong ituon o i-pokus ang kaugalingon sa paghimo sa mga butang nga ikaayo sa panglawas sama sa pag-ehersisyo o bisan unsang matang sa paugnat sa kusog.

Mas maayo usab matod pa nga molambigit sa kalihokan sa simbahan aron dili mabaling ang hunahuna sa pagpakabuang sa walay prubitso nga gidiling drugas.

“Instead nga mo indulge sa drugs, mas maayo pa anang physical activities o religious activities, diin makatabang sa inyong kaugalingon para ma-enhance ang inyong emotional, panglantaw sa inyong kinabuhi ug physical condition sa inyong lawas. Kinahanglan, more pa gyud,” tambag ni Antonio.