Nagpositibo sa MERSCoV Luwas Na

Ni Alex Mapoy

MERSCoV FREE: Gikomperma ni DOH Caraga 

Health Education and Promotion Officer II Romelyn 

Esther Torralba nga luwas na ang langyaw sa 

MERSCoV human nag-negatibo sa pinaka-

ulahing duha ka hugna sa lab test subay sa 

impormasyon nga nadawat gikan sa DOH 

Central Office. Photo by Alex Mapoy

BUTUAN CITY – Luwas na sa Middle East Respiratory Syndrome-Corona Virus (MERSCoV) ang langyaw nga unang nag-positibo sa nasangpit nga virus.

Sa pinakaulahing duha ka hugna nga laboratory test, nag-negatibo ang 36 anyos nga langyaw hinungdan nga makonsidera na kining luwas sa MERSCoV.

Bisan luwas na ang nahisgotan, apan, giklaro ni DOH Caraga Health Education and Promotion Officer II Romelyn Esther Torralba, pabilin nga gipailawom sa 14-day quarantine sa wala panganleng ospital ang 32 anyos nga babae nga “close contact” sa naasoy’ng langyaw subay sa impormasyong nadawat sa rehiyonal nga buhatan gikan sa sentrong buhatan nga atua sa kaulohan.

Samtang, gikomperma sa ahensya nga natultulan na ang nahimutangan sa 112 ka indibidwal nga gituohang nakahalubilo o na expose sa maong langyaw.

Daling gipailawom sa hugot nga monitoring sa Regional Epidemiology Surveillance Unit ang mga nahisgotan ug gipailawom sa 14-day observation period.

Alayon niini, padayon nga giawhag ni Health Secretary Janette P. Loreto-Garin ang tanang Pilipino kinsa bag-ohay’ng nakauli dinhe sa nasod gikan sa mga nasod nga na igo sa MERSCoV nga mo dalikyat sa pinakaduol nga tambalanan labi na kadtong nakasinati og flu, hilanat, ubo, sip-on, pagpanghatsi, o kaha gikalibanga.

Angayan usab matod pang kompletohon sa mga nahisgotan ang pag-fill up sa dealth declaration checklist dungan sa pagdasig nga isulte unsay tinuod ug dili mamakak bahin sa pamati sa lawas.

Kampante usab ang kalihim nga kayang mabatokan ug mapabiling luwas ang nasod sa maong sakit kon magtambayayong lamang ang tanan sa pagsumpo sa MERSCoV.