Malapasong Pulis Taktakon

Ni Alex Mapoy

ISKANDALO: Gipaneguro ni BCPO Spokesperson PSInsp.

 Renato Badajos kinsa tong mga termites o mga anay sa 

organization, ang organization dili gyud maglangay 

pagtanggal ana. Photo by Angel Lyn F. Gaviola

BUTUAN CITY – Gikondina sa liderato sa Police Regional Office (PRO) XIII ang pinakaulahi nga kontrobersiya nga gilambigitan sa duha ka mga dagkong opisyal sa kapulisan ning rehiyon.

Unod sa estorya sa katawhan sa nanglabay’ng mga adlaw ang pagkalambigit sa usa ka police colonel sa iskandalo diin gipiyestahan sa mga netizens sa social media ang ilang sex video uban ang usa ka empleyada sa goberno human kini na post sa facebook samtang ang laing pulis, kinsa nagranggo og Senior Police Officer 4, napaslak sa prisohan human nalambigit sa gidiling druga.

Sumala ni PSInsp. Renato Badajos, tigpamaba sa Butuan City Police Office (BCPO), wala gi-tolerate sa organisasyon sa kapulisan ang maong matang sa kasaypanan.

Dugang ni Badajos, manubag ang mga nahisgotan sa salaud nga nahimo sanglit ang nahimong kalapasan nakahatag kaulawon sa han-ay.

Gitin-aw sa opisyal, ang maong klase sa mga pulis, dili angayang magtunhay sa organisasyon sa higayon kini mapamatud-an sa salaud nga nahimo.

Bansag sa opisyal sa mga badlungong pulis, mga anay sila sa han-ay hinungdan angayan kining taktakon sa serbisyo.

Gi-angkon sa opisyal nga ubay-ubay na nga mga pulis nga malapason ang natanggal sa serbisyo, apan ang ihap sa mga nahisgotan ang tipik lamang sa kinatibuk-ang ihap sa kapulisan.

Pamugos sa nahisgotan, mismo sa lebel sa BCPO, pipila na ka mga pulis ang natanggal sa serbisyo human nalambigit sa gidiling drugas.

“The PNP Organization will never tolerate these kinds of erring police officers. Duna tay mga balaud o quasi-judicial sa sulod sa organization kining atong gitawag nga Napolcom Memorandum Circular No. 2,000 – 001: The Administrative Cases. Kini maoy mo taral o mo kaso sa mga erring police officers. Kon kinsa tong mga termites o mga anay sa organization, ang organization dili gyud maglangay pagtanggal ana. Gali, daghan nata gipang-dismiss. Not only in the administrative proceedings but also in criminal proceedings. Balikon nako, wala gyud mi nag-tolerate niining klaseha sa mga pulis. Even in our level here in BCPO, daghan na gyud ang na dismiss nga nag-involve sa illegal drugs,” pagklaro ni Badajos.