Desisyon Pabor sa Employer Gipasabot

Ni Alex Mapoy

DESISYON: Gipaneguro ni NLRC Caraga Executive Labor 

Arbiter Atty. Exequiel M. Dayot nga ang buhatan walay 

gidapigan ug tanang desisyon nga ipakanaug gibase sa 

argumento ug ebidensya. Photo by Alex Mapoy

BUTUAN CITY– Dili tanang kaso nga giduso sa mga reklamante ngadto sa buhatan sa National Labor Relations Commission (NLRC) Caraga ang madesisyonan pabor sa mga nahisgotan.

Giklaro ni NLRC Caraga Executive Labor Arbiter Atty. Exequiel M. Dayot atubangan sa media nga dunay mga kaso nga ilang nadawat ang nahukman pabor sa employer ug dili sa reklamante.

Pasabot ni Atty. Dayot, tanang reklamo nga ilang madawat ang patas kining dunggon ug desisyonan sibo sa argumento ug ebidensya nga ipresentar sa duha ka habig.

Dugang ni Atty. Dayot, matag reklamo ang paningkamotan nila kining ma-areglo aron dili na mo dako pa pag-ayo ang kasong giduso ug dili na usab mahasol pa pag-ayo ang duha ka habig.

Sa higayon nga dili ma-areglo, walay mahimo ang buhatan kondi tun-an ang mga argumento ug ebidensya nga giduso sa duha ka partido.

Kon makita sa buhatan nga huyang ang reklamo sa empleyado ug walay lig-ong ebidensya nga makapakusog sa kaso samtang ang argumento sa employer, lig-on dugangan pa sa mga ebidensya nga maoy magpalig-on sa giluwatang pamahayag sa nahisgotan, ang desisyon nga ipakanaug sa buhatan, adto kini pabor sa employer.

Apan, kon lig-on lamang ang argumento ug ebidensya sa reklamante, walay rason, sumala sa opisyal nga ang desisyon mo pabor sa employer sanglit na establisa ug napamatud-an sa empleyado nga dunay kalapasan ang gireklamong amo.

Sa maong kahimtang, subleng giklaro sa opisyal ngadto sa publiko nga walay gipaboran ang buhatan ug ang mga desisyon nga gipakanaug gibase sa gipresentar nga argumento ug mga ebidensya.