Family Assessment Niarangkada

Ni Alex Mapoy

DSWD Caraga Regional Director Minda B. Brigoli 

BUTUAN CITY – Giseguro sa kadumalahan sa Department of Social Welfare and Development (DSWD) Caraga nga tanang panimay ning rehiyon ang mapailawom sa assessment ilawom sa proyektong Listahanan.

Subay niini, hugot nga gimando ni DSWD Caraga Regional Director Minda B. Brigoli ngadto sa tanang field workers sa nasangpit nga proyekto nga walay ni bisan usa ka panimay ang labyan kondi kinahanglan ang tanang panimay sa usa ka lugar ang ma-assess.

Sa nasangpit nga proyekto, target niining ma-assess ang 494,372 ka mga panimay sa tibuok rehiyon sa Caraga basi kini sa impormasyon ni DSWD Caraga Social Marketing Unit Officer Maria Cecilia Sosas.

Giklaro ni Sosas nga mokabat sa 931 ka mga field staff ang padayon nga nag-assess sa kabalayan nga gisugdan adtong Mayo 11 ning tuiga.

Ning bulana, puntirya sa mga nahisgutan nga i-assess ang kabalayan nga nahimutang sa “rural areas” lakip na ang pinakahilit o pinakasuok nga bahin sa rehiyon labi pa ang mga lugar nga gipuy-an sa mga lumad.

Paghuman sa rural areas, isunod gilayon ang “urban areas” sa mga enumerators pag-assess gamit ang Family Assessment Form (FAF). 

Langkob sa FAF ang 52 ka mga “variables” nga gibahin ngadto sa ka lima – ang identification, socio-economic information, household rooster, declaration, ug certification.

Sa tabang niini, mahibaw-an ang socio-economic status sa matag panimay.

Nanghinaut na lamang ang kadumalahan sa rehiyonal nga buhatan ngadto sa tanang Caraganons nga mo cooperate kini kon mahidangat ang mga enumerators sa tagsa-tagsa ka panimay alang sa pagahimuong assessment.