Watershed Giulan, Operisyon Gisuspendi

Ni Alex Mapoy

Courtesy of Butuan City Water District

BUTUAN CITY – Taliwala sa nagkalagiting nga kainit sa panahon, nasinatian sa Taguibo Watershed Area ang kalubog sa tubig human gibundakan sa makusog nga ulan adtong adlaw’ng Dominggo.

Alayon niini, daling gisuspendi sa Butuan City Water District (BCWD) ang operisyon sa mga pasilidad nga gimuntar sa nasangpit nga dapit aron pagseguro nga dili kini madaut sa grabe ka lubog sa tubig nga hatod sa pag-ulan.

Sa text message nga nadawat sa Mindanao Centro Daily gikan sa water district, grabe kaayo ka lubog ang tubig sa “water source” hinungdan nga napugos kini pagpawong sa pipila ka mga pasilidad.

Subay niini, nihinay ang pressure sa tubig nga nagresulta nga pipila ka bahin ning siyudad ang walay suplay sa tubig.

Daling gipaaktibo sa water district ang lima ka mga pumping stations sa ingon padayon nga maserbisyohan ang mga namuyo sa sentrong bahin ning siyudad.

Nisaad usab ang kadumalahan sa water district nga sa higayong mo balik na sa normal ang kahimtang sa maong dapit, ibalik gilayon ang operation sa mga pasilidad nga nahimutang sa Sitio Iyao, Brgy. Anticala.

Kinasingkasing usab nga nagpaabot og despensa ang kadumalahan sa water district ngadto sa mga konsumidor nga sabton ang nasangpit nga sitwasyon tungod sa kalit nga pagdaut sa panahon sa maong lugar.

“ADVISORY (May 24, 2015): In view of the rainy weather at the Taguibo River Watershed, the operation of the facilities at the source is temporarily suspended as of 5:00pm, today, May 24, 2015. This is due to the incidence of high water turbidity level at the source.”

“As such, five (5) pumping stations are now operated to supply water in the City. Normal water pressure will be restored upon resumption of the operation of the BCWD facilities in Iyao, Anticala.”

“We are sorry for the inconvenience. Thank you very much for your continuous support to the BCWD,” text message sa water district.