Mechanization Program Gihingusgan

Ni Alex Mapoy

Dr. Rodolfo Estigoy (front, standing) discussing the benefits of new farm equipments to 60 farmer-participants in Bayugan City. Courtesy of DA Caraga

BUTUAN CITY – Mas gipakusgan sa kadumalahan sa Department of Agriculture (DA) Caraga ang pagbida sa Farm Mechanization Program ngadto sa mga mag-uuma.

Alayon niini, lima ka adlaw nga Information Caravan lambigit sa Farm Mechanization ang gipasiugdahan sa rehiyonal nga ahensya uban sa pag-abag sa Philippine Center for PostHarvest Development and Mechanization (PhilMech) sa mga probensya sa Agusan del Sur ug Surigao del Sur.

Katuyoan niini nga mapaabot ang nahisgutang programa ngadto sa mga mag-uuma ug maengganyo ang hugpong sa mga mag-uuma nga mogamit sa maong teknolohiya.

Sa maong paagi, maseguro nga makab-ot sa mga Caraganons ang “food security” ug “food sufficiency.”

Gipaabot ni DA Caraga Information Section Officer Vanessa Sanchez, ang caravan sa gikonsiderang “rice producing areas” sama sa dakbayan sa Bayugan, mga lungsod sa Esperanza, San Francisco, Rosario, ug Trento pulos sakop sa probensya sa Agusan del Sur, ug mga lungsod sa Tago, San Miguel, Madrid, ug Cantilan, pulos sakop sa Surigao del Sur.

Dugang ni Sanchez, gitambongan ang nahisgutang kalihokan sa hugpong sa mga mag-uuma uban ang tagsa-tagsa niini ka mga lideres.

Gipasabot ni DA Applied Communications Division of PhilMech Chief Dr. Rodolfo Estigoy, ang mga bentaha sa pagamit sa abanteng teknolohiya nga pang-uma.

Pamugos ni Dr. Estigoy, mas ubos lamang ang galastohan sa pagtikad sa gipanag-iyahang basakan ingon man alkansi kon mo gamit ang mag-uuma sa nahisgutang teknolohiya.

Dali usab nga gibakwi sa opisyal ang kabalaka sa mga mag-uuma kabahin sa isyu sa labor displacement tungod sa pagbida sa ahensya sa pagamit og makinaryas sa pagtikad sa basakan.

Gidasig sa opisyal ang tanang “farm laborers” nga maghugpong ug i-organisa ang Farm Service Provider (FSP) aron kini matabangan.

Si DA Caraga Information Section Chief Chief Emmylou T. Presilda ang matod pa, nipasabot sa tanang mag-uuma nga nitambong sa naasoy’ng kalihokan nga katuyoan sa grupo ang pagpaabot sa maayong balita sa hisgutanang panguma ug matabangan ingon man magiyahan pag-ayo kon unsaon pag-avail sa mga serbisyo nga gihanyag sa rehiyonal nga buhatan.

Ang gihimo sa rehiyonal nga buhatan ang niani og positibong reaksyon gikan sa mga mag-uuma diin ilang nabati nga dunay goberno nga andam motabang sa mga yanong mag-uuma nga mapalambo ang kinitaan ingon man kahimtang sa pamuyo.