SSS Transaction, Puwede na sa Mall

Ni Alex Mapoy

SSS Butuan Assistant Branch Head Arnold Pepino

BUTUAN CITY– Mas gihatagan og pabor sa kadumalahan sa Social Security System (SSS) Butuan ang tanang membro nga makapahigayon og transaksyon sa mas “convenient” nga lugar hinungdan nga nagmuntar kini og Satellite Office sa Robinson’s Place Butuan.

Niadtong mga membro nga nagplano paglulinghayaw sa nahisgutang mall, mahimo kining makapahigayon usab og transaksyon sa SSS, pinaagi sa pagbisita sa ilang satellite office diin anaa gipahiluna usab ang ilang SSS Kiosk.

Sumala ni SSS Butuan Assistant Branch Head Arnold Pepino, tanang transaksyon ang mahimo sa membro, gawas na lamang sa mga “claims” sanglit kinahanglan kining mo bisita sa main office nga nahimutang sa sentrong bahin ning siyudad.

Dugang ni Pepino, niadto gusto nga mo tan-aw sa monthly premium, mahimo kining sa Robinson’s Place Butuan na himuon.

Sa mga membro usab nga gusto nga makabaton og Unified Multi-Purpose ID (UMID) sa SSS, puwede na sa ilang satellite office himuon ang pagkuha sa hulagway diin dunay pipila ka personahe sa PhilPost Butuan gibutang aron maoy mang-picture.

Gipamugos sa opisyal, sa maong inisyatiba sa lokal nga buhatan, matabangan ang mga membro nga dili na kini mahasol pa pag-ayo sanglit mausa naman ang lakaw, gawas nga makasuroy-suroy sa maong mall, makapahigayon pa kini og transaksyon sa SSS.

Sa mao usab nga paagi, malikayan na ang taas nga linya sa mga membro sa main office nga magpahigayon og transaksyon.

Abre ang satellite office sa ahensya gikan Martes hangtod Sabado, alas – 8:00 sa buntag hangtod alas – 5:00 sa hapon.