Magahat Warrior Dis-armahan

Ni Alex Mapoy

Magahat Warriors nipakita sa puwersa ngadto sa mga sakop sa media. Photo by Richard Grande

BUTUAN CITY – Pursigido ang kadumalahan sa Police Regional Office (PRO) 13 nga dis-armahan ang Magahat Warrior nga nakabase sa bukirang bahin sa lungsod sa Barobo, Surigao del Sur.

Gikabutyag ni PRO 13 Spokesperson PSupt. Martin Gamba, angayang i-neutralize ang maong grupo pinaagi sa pagdis-arma sa nahuptang mga armas aron dili kini magamit sa bisan unsa mang kremin sa nahisgutang lungsod o kaha probensya.

Una nang gipahayag sa grupo pinaagi sa usa ka Kumander Jingky ngadto sa mga sakop sa media nga katuyoan  sa kamugnaan sa grupo mao lamang ang pagbatok sa mga rebelde ug mapanalipdan ang katawhang lumad sa gitikad niining luna ingon man mga negosyante aron dili kini makilkilan sa mga komunista.

Si Kumander Jingky, kanhi lumilihok sa Front Committee 14 sugod adtong 1996, apan ning tuiga, nibiya kini sa armadong pakigbisog ug niabin sa puwersa sa mga lumad nga nagkahiusa aron mapanalipdan ang komunidad sa mga lumad.

Sa inisyal background checking sa kapulisan sa grupo, gidudahan ang grupo nga maoy nagpaluyo sa pagpangilkil ngadto sa mga lumad ug serye nga pagpatay ug nalambigit usab matod pa kini sa nagkadaiyang iligal nga kalihokan, apan una na kining gihimakak ni Kumander Jingky ang maong alegasyon.

Dugang ni Gamba, angayan nga ipailawom sa makuti nga balidisyon ang maong grupo aron masuta kon nalambigit ba kini sa nagkadaiyang kremin sukad namugna ang grupo.

Kon ugaling mapamatud-an nga nalambigit ang grupo sa bisan unsa nga matang sa kremin, mahimo kining pasakahan og kaso aron manubag sa salaud nga nahimo.

Gipasabot sa opisyal, wala man nibatok sa kagamhanan ang maong grupo, apan, sa mata sa balaud, ang kapulisan ug militar lamang ang gihatagan og katungod nga maghupot og armas aron batokan ang bisan unsa mang grupo nga maghatag kakuyaw sa komunidad.

Basi sa gihimong pakisusi sa PRO 13 ngadto sa Barobo Municipal Police Station dihang kini gikuhaan og komento sa media bahin sa kamugnaan sa grupo, gitumbok nga ang grupo, gipangulohan sa usa ka Bobby Tejero ug duna kini mga sakop nga pulos naghupot sa mga tag-as nga kalibre sa armas.