No Water Rate Increase, Gipasalig

Ni Alex Mapoy

VISITATION: Gisusi sa Butuan Global Forum ang Public-Private Partnership (PPP) Treated Bulk Water Project sa Sitio Iyao, Brgy. Anticala ning siyudad uban ang kadagkoang opisyal sa water district. Photo courtesy of BCWD

BUTUAN CITY – Mismo si Butuan City Water District (BCWD) General Manager Engr. Anselmo Sang Tian ang niklaro nga kon mahimong fully operational na ang PPP Treated Bulk Water Project, walay umento sa singil sa tubig sulod sa unang tulo ka tuig.

Ang nahisgotang pagtin-aw gihimo ni Sang Tian atubangan sa mga membro sa Butuan Global Forum nga gipangunahan ni Atty. Josefe Sorera-Ty.

Sumala ni BCWD Senior Public Relations Officer Ramil S. Barquin, gidiga ni Sang Tian ang comparative water rates sa water districts ngadto sa grupo.

Giklaro ni Sang Tian, ang water rate sa BCWD nabutang sa 8^th place sa highest water rate sa tibuok rehiyon sa Caraga kansa makonsidera kining barato kon itandi sa uban.

Nasayran nga gibisita sa grupo ang water district adtong adlaw’ng Sabado aron suknaon ang kadumalahan ni Sang Tian kon unsay gihimong lakang human sa Bagyong Seniang aron mahatagan og kasulbaran ang suliran sa tubig.

Lakip sa gisusi sa grupo ang Public-Private Partnership (PPP) Treated Bulk Water Project nga nahimutang sa Sitio Iyao, Brgy. Anticala ning siyudad.

Gipasalig usab ni Sang Tian, oras ma-fully operational ang maong proyekto, 24/7 na ang suplay sa tubig ning siyudad.

Human nakig-dayalogo ang grupo sa kadumalahan sa buhatan, gisusi usab ang maong proyekto aron mahibaw-an ang pinakaulahing kahimtang niini.

Adiser mahuman ang kasamtangang tuig, nipasalig ang water district nga matilawan na ang serbisyo sa maong proyekto.